Hulog sa langit

Gula 7

Human sa programa ni Rey nianang gabhiona, nagpaabot siya nga motawag pagbalik kaniya si Jane, apan pakyas siya. Daw luya ang pamati ni Rey sa iyang lawas, wala siya makasabot sa iyang gibati.

Pagka-ugma, gipatugtog na usab niya ang Hey ni Julio Eglesias. Ang unang linya sa lyrics niini nagkanayon “Hey, its wonderful to see you once again, see you smiling when you call my name.”

Wala gayud mokontak pagbalik si Jane. Dili usab siya makakontak sa numero nga gihatag niini kaniya. Daghang mga gabii nga gilaay na pag-ayo si Rey. Gihangyo niya ang program manager nga mobakasyon una.

Walay klaro ang iyang pagbalik. Miadto si Rey sa dapit sa iyang Lola, ang lungsod sa Carmen, Bohol, apan maminaw siya sa iyang programa nga gidumala lang sa iyang kauban.

Mitingog ang iyang cellphone, dunay nanawag. “Hello.. kumusta ka?

Daw giluparan og langgam buntog ang dughan ni Rey, misinggit siya sa kalipay. “Jane! Jane!,” dayon wala kapugngi ni Rey ang paghilak. “Wala na ko’y gana pa nga mag-programa Jane, moundang na ko sa pagtrabaho sa radyo.”

“Ngano man?” gipangutana siya ni Jane. Walay kukauwaw nga gitug-an ni Rey ang matuod nga hinungdan. Wala dayon motingog si Jane.

“Sigi, makabalik ka’g programa ugma sa gabii? Kun mahimo nimo ang pagbalik sa programa, duna ko’y surpresa nimo. Sigi Rey, bye,” wala magdugay pakig-estorya si Jane.

Sagol kalipay ug kaguol ang iyang gibati kay wala molahutay og pakig-estorya kaniya si Jane. Pagka-ugma, giputol ni Rey ang taas pa unta niya nga bakasyon ug mibalik siya sa Sugbo.

Pagka gabii. Mibalik si Rey pagdumala sa iyang programa. Gihimo niya ang naandan niya nga pagpahinungod og awit kang Jane. “Suya mi ana Kuya Rey da. Kinsa gud na si Jane?’ hapit magkadungan ang iyang mga bisita nga tigpaminaw.

Hapit na mahuman ang programa. Gipatugtog ni Rey ang awit “Please Tell Me You Love Me.” Takulahaw lang nga miabli ang pultahan ug napasiga ang mga mata ni Rey – si Jane ang misulod.

“Jane! Jane! I miss you so much!” naggaksanay silang duha atubangan sa mga bisita nga tigpaminaw ni Rey. “Friends, siya si Jane ang kanunay ko nga pahinungdan og awit, imbitahon mo namo sa among kasal.”

“Gisukod nako kun mahal ba usab ko nimo Rey mao nga wala ko mokontak nimo sa taud-taud nga panahon. Tana, adto ta sa balay naghuwat sila si Daddy ug Mommy nato.” (Kataposan)