Balik sa gibiyaan nga kalibotan

Gula 49

Taodtaod siyang mihukdong sa ikaduhang ang-ang sa hagdanan sa iyang payag. Unya nakignat siya. Misanting ang iyang mga dalunggan pagkadungog sa dahunog sa makina sa sakyanan sa kahanginan. Nasabot niya sa andar sa makina nga nagkaduol kini sa iyang nahimutangan. Wala siya makasabot sa lintunganay nga kakulba nga kalit lang mibasal sa iyang dughan.

Mipalayo siya sa payag. Mipasalipod sa punoan sa dakong kahoy. Gipanid-an niya ang naglupad nga helikopter nga nagkaduol sa iyang tungod. Wala hinuon siya mabalaka nga makita sa mga sakay niini ang iyang payag. Nasalipdan kini sa bagang dahon sa kakahoyan sa daplin sa lasang.

Miipli siya sa punoan sa kahoy dihang miagi na ang sakyanan sa kahanginan sa iyang tungod. Misaylo kini sa iyang nahimutangan ug tulin nga nagpalayo. Gisundan kini sa iyang panan-aw. Mabaw ra kaayo ang paglupad sa maong helikopter. Igo lang kining milabaw og diyotay sa kakahoyan.

Mogawas na unta si Gener gikan sa iyang gipasalipdan. Apan dihay laing andar sa makina nga iyang nabati. Mibalik siya pagtago. Apan ang iyang mga mata gipunting sa ibabaw. Lagbas sa gilhang sa bagang mga dahon sa kahoy nasihag niya ang laing sakyanan sa kahanginan nga miagi. Nagsunod kini sa giagian sa unang helikopter nga miagi sa iyang tungod. Nagpaingon kini sa kasadpan -- sa bukid sa Kabangbang!

Dihay kabalaka nga kalit midumbol sa iyang balatian. Nahinumdom siya sa mga rebelde nga maoy nagluwas kaniya. Atua magkampo ang pundok ni kumander Turo sa bukid sa Kabangbang. Takulahaw lang, may talan-awon nga mililas sa iyang handurawan. Salida sa daw naukay nga mga hulmigas. May naglupad nga higanteng mananap nga nagdala og kamatayon. Sa dagkong bitiis sa kakahoyan naghupo ang mga ihalas. Nangandam sa ilang kaugalingon sa bisan unsang mahitabo. Andam mosugal sa kataposang alas aron pagpanalipod sa giyatakan nilang katungod sa pagpakabuhing malinawon.

Nakapangagho siya. Ang labok sa kakulba mikupog pag-ayo sa iyang dughan. Lain ang iyang gibati. May kahingawa nga milunop sa iyang kahiladman. Sila si kumander Turo ang unod sa iyang hunahuna.

Gipugos niya pagwakli ang gaway sa kabalaka nga mikuylabod sa iyang kaisipan. Gikuha niya ang pinuti nga gibutang sa usa ka suok sa payag. Daghan siya’g buluhaton karong adlawa may kalabotan sa iyang pagtunhay dinhi sa bag-o niyang kalibotan. -- Sumpayan pa