Forgiveness sa Pasko

Dangtag usa ka tuig human nakapasar sa bar exams si Claro Hermoso niduaw siya sa iyang mga higala sa husgado. Sa Regional Trial Court, Branch 77, sa lungsod sa Tulcan, suod niya tanang empleyado, way labot ang huwes nga si Judge Dante Reyes.

Tungod kay sa onse ka tuig niyang trabaho sa bupete ni Atty. Albert Inso isip typist/legal research, hapit kada adlaw masuroy siya ining husgadoha kay nia dinhi ang kinabag-an sa mga kasong gilabanan ni Atty. Inso.

Nisamot pa dihang nihana og kahap ang mga mata ni Atty. Ingo tungod sa glaucoma (78 na siya, retirado gikan sa B.I.R.) si Claro nahimong tig-agak sa abogado inig tambong sa bista.

Naglagot ug nagdumot ni Claro si Judge Reyes. Kay dihang may kaso si Atty. Inso nga gi-dismiss sa huwes, si Claro ang nihimo sa Motion For Reconsideration. Tungod kay mainiton ug maikagon si Claro sa iyang mga argumentong gigamit (self-supporting law student siya atong panahona) napalutsan niyag mga hang nga pulong ang motion.

Nainsultuhan ug nasakitan ang huwes sa mga pulong sa motion nga gipirmahan ni Atty. Inso. Gipalutaw sa abogado nga ang huwes dunay mga sipyat sa iyang Order nga nagmatuod nga siya nakahimo og “grave abuse of discretion” ug “gross ignorance of the law”.

Way sala si Claro. Kay sugo man lang sa iyang among abogado ang gigamit nga pulong sa motion. Gani, niingon gyud si Atty. Inso “Birahi nang huwes, Clar!”. Nasayud ang huwes nga si Claro ang naghimo sa motion kay hap na ang mga mata sa abogado. Busa, ang kalagot ug pagdumot sa huwes, tua napunting ngadtong Claro.

Dihang bag-o lang nipasar sa bar si Claro unya gisugo ni Atty. Inso sa pagtambong sa husgado ni Judge Reyes aron pagpangayo og postponement sa usa ka kaso, nakasinati dayon si Claro sa kasuko sa huwes.

Gisabonan siya’g kasaba sa huwes atubangan sa daghang mga abogado ug dumoduong sa iyang husgado. Igo nalang niingon si Claro “I’m sorry, Your Honor. I apologize, Your Honor!” Bisag way klaro kun unsay sala sa batan-ong abogado. Gisabot nalang ni Claro nga dugay na ning nag-umido sa galamhan sa huwes. Karon lang nakahungaw.

“Lingkod ‘sa diha, Clar. Ako lang sudlon ang huwes sa chambers. Pahibaw-on nako nga nitanyag kag usa ka inasal para sa among Christmas Party. Kay sukad sa diyes anyos niyang pagkahuwes dinhi, wa gyud nay abogadong gidawatan og regalo sa Pasko,” ni Atty. Delia Conde, clerk of court sa husgado, dayong liso sa door knob sa pultahan sa chambers. Nilingkod si Claro sa lingkuranan dikit sa lamesa sa Interpreter nga si Virgilio Duarte. Nagpakitambag si Virgilio kun unsay mga tips sa pagpasar sa bax exams, kay nag-review na siya alang sa bar exams. “Put God’s law over and above man’s law. Sa di pa ka mobasa’g law books, Bibliya unaha’g basa. Kay matud pa ni Herbert Armstrong, founder sa Worldwide Church of God ‘The word of God is the foundation of knowlege’ ni Claro. Mapahiyomon. Nagtotok lang si Virgilio ni Claro.

“Niingon si Judge Clar, nga dawaton niya imong inasal, ubos sa kondisyon nga motambong gyud ka sa among Christmas Party karong Sabado” ni Atty. Conde paggawas niya. Mapahiyomon kaayo.

Sa pagkatinood, bag-o lang nakuha si Claro nga in house counsel sa usa ka dakong land developer sa Sugbo. “Okay kaayo. Approved without thinking” ni Claro. Nahimuot. Nag-apir ang duha ka manlalaban.

Diha gisaulog ang Christmas Party sulod sa husgado nga air conditioned. Ang lamesa nga taas para sa mga abogado kun may bista, maoy gipamatungan sa nagkalainlaing lamiang putahe sama sa hamonada, kaldereta, humba, bam-i, potsero, adobong baboy ug manok, chop suey, fish fillet, eskabitsing pugapong dagko, ug tulo ka inasal baboy. Ang lingkuranan ni Claro gipapitlan gyud og abiso nga “Reserved for Atty. Hermoso”.

Paglingkod niya, wa nagdugay nitupad si Judge Reyes niya.Ug mapahiyomon ang huwes nga nakig-istorya ni Claro. Puro pulong sa Bibliya ang gihisgutan sama sa “kun labayon kag bato balusig pan”. Puro forgiveness ang gihisgutan sa huwes. Nitubay si Claro kay Bible reader man sab siya. Nasabtan niya nga sa pasumbingay, nangayo’g pasaylo ang huwes niya. Ug gipasaylo na sab siya’s huwes. (Kataposan)(Sa gusto’g libreng kunsulta, dad-a ning pahina sa opisina sa tagsulat. Iatol og Sabado sa buntag).