Gikapoy kanunay

Dear Tita Salie,

Just call me I, 21 years old, dunay kaipon karon nga maoy hinungdan nga ako nagpadala kanimo niining akong suliran.

May three years na kami nagtipon apan daw sa nawad-an na man hinuon ko og gana niya. Unsaon man sad god nga inig abot niya sa balay gikan sa trabaho magdungan mi og kaon apan walay estorya kay kuno kapoy na kaayo siya. Human niya og kaon diretso na siya sa higdaanan kay matulog. Tupad kami kun matulog apan dili siya ganahan nga mag-estorya pa kami. Wala kami plano mahitungod sa among future kay wala man kami verbal communication. Magkita ra man mi sa balay panahon sa tingkaon ug tingkatulog.

31 years old pa man unta siya apan nganong dali ra man siya kapoyon sa trabaho. Gusto unta ko moeskuyla apan mag-agad pa ko niya ug sa iyang trabaho kay trainee pa man siya. Kun gusto ko mosuroy dili usab siya kay sayang ang kwarta, mao nga molaag na lang ko ako rang usa.

Gikapoyan na gayod ko sa among relationship, Tita. Gusto unta ko mobiya niya apan dili nako mabuhat kay love man nako siya. Unsa may akong buhaton? Please help me. Thank you and God bless. -- I

* * *

Good day! Lisod tinuod sabton ang inyong sitwasyon kun nganong ingon na niana ang inyong relasyon nga unta mga batan-on pa man kaayo mo. Anaa pa kamo sa honey stage kay sa akong tan-aw bag-ohay pa lang kamo nagtipon kay batan-on ka pa man kaayo.

Ayaw siya pasagdi nga maoy mouna pag-open og istorya. Mas maayo nimong buhaton nga kun hapit na siya mouli, magluto ka nang daan. Nagluto ka na samtang wala pa siya. Kun moabot na siya ug nahuman ka na pagluto siya na usab ang imong asikasohon.

Wala nimo gisulti kun unsay iyang trabaho. Basin kun bug-at kini kaayo og tinuod gayod nga kapoy ang iyang lawas. Lisod ang iyang trabaho mao nga dili usab siya basta-basta lang mogasto sa iyang kuwarta. Basin gusto niya nga dunay padulngan ang iyang kwarta, kay iya kining gipatoan og singot.

Busa inig abot niya, biyai ang imong gibuhat ug sugata siya. Imo siyang ilisan og imong pangumustahon kun unsay nahitabo sa iyang adlaw samtang atoa kini sa iyang trabaho. Try to make yourself interesting ngadto kaniya. Kanang ma-entertain siya og mawagtang ang iyang kakapoy sa lawas. Gamay nga hilot sa tiil ug abaga ug sa iyang kamot. Ug samtang naghilot ka sa iyang lawas padayon ang inyong conversation o panag-estorya. -- Tita Salie