Third degree cousin

Dear Tita Salie,

Maayong adlaw kanimo, Tita. Mosulti ko nimo sa tinuod nga diri sa among lugar sa Bugnay, sa Naga City paborito gyod namo ang Banat News. Sayo sa kabuntagon amo gyod dayon kining pangitaon. Ganahan pud kaayo mi sa imong column ang pasabta kay daghan mi og makat-onan.

Tawga lang ko og Bertz, 24 years old ug nagpuyo diri sa Bugnay, Naga City. Hangtod karon nagpabilin pa gihapon nga ulitawo kay unsaon man kining akong gugma mora og wala may katumanan.

Kun mag-date mi sa akong hinigugma kanunay lang namong hunahunaon kun puyde ba kaha namo nga ipadayon ang among pagbati sa usa’g-usa. Love kaayo namo ang usa’g-usa, Tita. Saksi gyod ang langit niini nga pareho kaming matinud-anon sa among mga pagbati. Apan sigon sa mga nasayod sa among relasyon moingon man dili kamo puyde nga magkadayon kay manag-agaw pa kami.

Third degree cousin nako ang akong hinigugma, Tita. Tinuod ba gyod nga dili mi puyde nga magminyo? Love gyod kaayo nako siya, Tita. Palihog pasabta ko. Daghang salamat sa imong pagtagad. -- Bertz

* * *

Maayong adlaw usab kanimo, Bertz. Daghang salamat sa imong pag-angay sa pasabta column. Akong gipaningkamutan nga ako makatabang og duna moy makat-onan.

Daghan usab kaayo ang nagproblema nga susama sa imong sitwasyon. Sukad pa sa unang panahon daghan na ang nahigugma usab sa ilang ig-agaw o paryente ug nangandoy usab nga mahatagan og kagawasan ang ilang gugma. Apan ang uban mohukom na lang nga magpuyo tungod kay supak man gyod sa balaod ug sa atong naandan.

Tungod niining maong sitwasyon, ang atong simbahan adunay kabag-ohan nga nahukman. Aron malikayan ang pagpuyopuyo sa mga manag-agaw nga nagminahalay ilang gipatas-an o giluagan ang naandan. Hangtod lang second degree cousin ang dili puyde minyoon. Apan kining imong uyab nga third degree cousin na nimo wala kamoy angayan problemahon pa, gawas sa inyong mga katigulangan, mga lolo ug lola o bisan ang inyong mga ginikanan kay wala pa maanad niining maong kabag-ohan. Ang inyo lang ipasabot kanila nga gitugotan na kini sa atong simbahan aron masulbad ang mga problema kabahin niining sitwasyona. -- Tita Salie