'Demolisyon'

Andam na ang demolisyon team. May order na ang korte nga nagmando nga ipademolis na ang mga squatter nga nag-ukopar sa luna nga gipanag-iya ni Mr. Cheng, usa ka insek nga negosyante.

Pinalit ni Mr. Cheng ang maong yuta gikan sa magtiayong Segundo Petra.

Nakahukom ang magtiayon sa pagbaligya sa ilang yuta tungod kay mga tigulang na sila ug wala silay anak nga sarang makasunod niini. Ug si Mr. Cheng maoy nakapalit sa maong yuta ubos sa kasabotan nga gipangayo sa magtiayon nga anhi lang gihapon sila mopuyo samtang buhi pa sila.

Sa gidak-on nga usa ka ektarya, nahilakip sa kasabotan nga dili mangayo si Mr. Cheng og bahin sa abot sa yuta, ug abagahon sa magtiayon ang balayranan sa buhis matag tuig. Miuyon si Segundo ug Petra niini. Tabunok kaayo ang yuta ug maayo ang abot sa mais, kamote, balanghoy ug ubi. Sobra pang makabayad sila sa buluhisan matag tuig.

Sa pagpanglabay sa katuigan, ingon nga gilatid nang daan sa kahitas-an ang kapalaran sa usa ka tawo, si Segundo ug Petra wala na makahawid sa kamatayon. Si Petra maoy unang mitaliwan ug paglabay sa usa ka tuig misunod usab kaniya si Segundo.

Unya, nanuyhakaw ang daghang mga balay sa nabakanteng yuta. Pamilya-pamilya iyahay’g tarok sa ilang mga balay nga walay pagpahibawo ug pagtugot ni Mr. Cheng. Unsa nalang ang kahikurat ni Mr. Cheng sa pagkasayod niya nga iyang yuta napuno na sa daghang mga balay. Midangop si Mr. Cheng sa korte kay ang mga squatters nagmagahi kini sa pagpahawa.

Gipangulohan ni Col. Wilson Gonzales ang demolisyon team. May mga bombero usab nga andam mopasirit sa ilang tubig sa higayon nga mopakita og pagsukol ang mga squatter. Pinaagi sa mando sa korte nga maoy lig-ong sukaranan sa pagdemolis, ang mga alaot ug timawa nga hingtungdan igo nalang sa paghilak sa kahinugon ug kawili sa ilang mga pinuy-anan nga way kukaluoy’ng gibunalan sa maso, martilyo ug bara de kabra gikan sa mga tawo nga gitahasan sa pagdemolis. Dinhay pipila ka mga tawo nga buot unta mosukol. Migunit og dos por dos, botelya sa softdrinks aron unta ikasukol sa nanagdemolis, apan wala sila’y nahimo atubangan sa tumoy sa pusil sa mga guwardiya.

Apan si Mr. Cheng adunay kinaiya nga manggiluy-on. Dili siya sama sa ubang pikot nga palasubas. Gihatagan niya ang matag pamilya og hinabang pinansyal aron makabangon pagbalik. Unya, gipasaligan pa gayod ni Mr. Cheng nga ihatod sa iyang dump truck ang ilang mga butang ngadto sa tagsa-tagsa nila ka mga pinuy-anan.

“Salamat kaayo, Mr. Cheng, sa imong tabang kanamo.” Hapit magdungan ang mga tawo sa pagpasalamat ngadto kang Mr. Cheng. Ang kasuko nga kaganina nag-alintabo sa ilang hunahuna, karon inanay’ng napuypoy ug nangahulog diha sa tagsa-tagsa nila ka mga dughan.

Mipahiyom si Mr. Cheng ug miwarawara sa iyang tuong kamot samtang nag-anam kalayo ang iyang gisakyan nga awto. (Katapusan)