Hulog sa langit

Gula 1

Reporter sa radyo si Rey. Usa ka adlaw, mitambong siya og tigum uban sa laing mga sakop sa ilang news department nga gipatawag sa iyang manager. Atul sa tigum, miabli ang pultahan ug nakita sa mga reporters ang technician nga si Eric uban sa gwapa nga babaye.

“Unsay ato Rick?,” gisukna ni manager Cerge ang radio technician nga mora’g dunay tuyo. Misulod ang technician ug misunod kaniya ang gwapa nga babaye nga tingali ang edad 18-anyos, may pagka buwagaw ang buhok.

“Dunay reklamo kining babaye sir… gilungkab kuno ang iyang kabinet sa mga polis nga mironda sa iyang gipuy-an ug gikuha ang iyang kwarta,” matud sa technician nga si Erick.

Wala maglangan, gimandoan sa manager si Rey nga imbistigahon ang reklamo sa babaye. “Okay, I’ll assign one of my reporters to attend to your complaint. Rey you are excuse from this meeting,” matud sa manager.

Nagpangidlap ang mga mata sa ubang reporters nga klaro kaayo nga nasuya nga didto kang Rey isangon ang maong tahas paghimo og imbistigasyon sa reklamo sa babaye.

Gipasiklapan ni Rey ang bayhon sa babaye, ang pamanit niini. Sa iyang tan-aw arang-arangan nga pagka babaye kining mireklamo. Panagan-on kaayo si Rey ug naglibog unsaon niya pagsugod ang imbistigasyon.

“Duna ka bay sakyanan Ma’am?” iyang gipangutana ang babaye. Mihapit usa sila sa front desk sa radio station. Gikuhaan ni Rey og mga initial information ang babaye, una ang iyang ngalan, edad, address ug ang iyang reklamo.

“Jane, ang problema kay nag-motor ra ba ko. Unsay sakyan nimo paingon sa D. Jakosalem?” gisukna ni Rey si Jane. “Mosakay man ko’g motor, no problem,” matud sa babaye.

Mipaingon dayon sila sa giparkingan ni Rey sa iyang motorsiklo. Miuna siya pag-angkas sa motor ug gipaandar. “Sigi na, sakay na Jane,” giingnan ni Rey ang babaye.

Nanukad si Rey aron dili sila matumba inig-angkas sa babaye. “Sigi na, nakasakay na ko sir,” matud ni Jane dihang napahimutang na siya paglingkod. Sa pagsugod na’g dagan sa motor, sanglit dangog ang lingkoranan sa motor, midailos si Jane sa buko-buko ni Rey.

Anam-anam nga nabag-id ang dughan sa babaye ngadto sa buko-buko ni Rey. Gibati og kalalim si Rey samtang gibatyag niya ang matag karon ug unya mobag-id ang duha ka bugdo sa dughan ni Jane nga modaitol sa iyang buko-buko. (Sumpayan)