Maunongon Ang Gugma

Gula 87

“Nagbayad na gayod si Randy sa iyang kasal-anan,” nagkanayon si Danica. “Kun tinuod man ang akong pagduda nga siya ra usab ang utok sa kamatayon ni Efren, nahatagan na gyud og hustisya ang gidangatan sa kanhi kong hinigugma.”

“Karon nga nasulbad na ang imong problema,” ni Jeffrey pa, “puyde na tingaling mobalik ka na ngadto sa poder sa imong mga ginikanan. Nakaseguro kong dili ka na nila pugson sa pagpakasal kang Randy karon nga nabisto na ang matuod nga pagkatawo niini.”

Wala motingog si Danica. Kalit lang milamugdong ang iyang nawong. Wala siya makauyon sa gisulti ni Jeffrey.

“O, nganong kalit man lang nag-Biyernes Santo ang imong nawong?” Sukit ni Jeffrey. “Wala ka ba diay malipay nga wala nay Randy nga magsamoksamok nimo?”

“Nalipay man,” matud ni Danica. “Ang wala nako ikalipay mao ang imong gisulti nako.”

“N-nga unsa?”

“Nga imo na kong papaulion. Sa tuno sa imong sinultihan, mora’g gusto na ko nimong hinginlan. Gihasolan ka na ba nako?”

“Nasayop ka, Danica. Dili kana ang ania sa akong hunahuna. Gusto ko lang nga mobalik na sa normal ang imong kinabuhi.”

“Kaha?” -- Sumpayan pa