Maunongon Ang Gugma

Gula 86

“Ayaw na pagminaot, Mr. Unson,” ni Col. Noot. “Nasayod na kami nga usa ikaw sa lig-ong mga haligi sa Bangkulis Gang.”

“Nagpatuyang ka man lang og yawyaw, Col. Noot?”

“You have the right to remain silent, Mr. Unson.”

Ug wala makalihok sila si Randy ug mga kauban sa dihang gipangdis-armahan sila sa kapolisan ug gipangposasan. Ang ubang mga polis nagdali sa pagsusi sa sulod sa payag.

“Sir,” miingon ang usa ka sakop ni Col. Noot nga mao pay paggawas gikan sa payag. “Wala nay tawo sa sulod sa payag. Nakasibat na sila si Jeffrey.”

Headline sa mga balita sa radyo, telebisyon ug pamantalaan ang pagkasikop kang Randy Unson ug mga kauban nga gisundan sa pagkaaresto sa uban pang mga personahe nga nalambigit sa sindikato. Human kang Randy, maoy sunod nga gidakop ang hepe sa NARCOM ug ang deputy niini. Sunod nga gisikop mao ang pipila ka kongresista ug inilang mga negosyante sa nasod.

Nasayran nila ni Danica ug Jeffrey ang katibuk-an sa mga panghitabo. Bag-o lang nahibalik si Jeffrey sa dapit nga maoy gibalhinan nila pagtago. Gikan pa si Jeffrey sa kinapusoran sa lungsod kay naniid kini’g kisaw sa mga balita. Mibalik kini sa gitagoan nila ni Danica nga nagdala na sa pamantalaan nga nagpatik sa kontrobersiyal nga pagkasikop sa tanang mga sakop sa Bangkulis Gang. -- Sumpayan pa