Gula 41
“Nakasaksi ang akong mga sakop sa gibuhat sa mga sundalo kanimo,” sa kumander pa. “Wala lang sila makakita dayon og higayon nga maluwas ka. Gikasubo namo ang imong gidangatan.”
“Salamat sa inyong pagtabang nako,” ginuntan sa ping-it ang iyang sinultihan.
“Wala ikaw’y angay pasalamatan,” matud sa kumander. “Katungdanan namo ang pagtabang sa mga tawong nabiktima sa pangabuso ug panaugdaog.”
Dihay kahilom nga mipataliwala kanila. Ang kumander milingkod sa ngilit sa lantay nga iyang gihigdaan. Ang kauban niini miduol sa bentana ug milantaw ngadto sa gawas. May gianinaw kini sa palibot.
Gisuwerte lang kadtong mga sundalo nga mibun-og kanimo,” giwakli sa kumander ang kahilom nga nagpatunga kanila.
“U-unsay buot mong ipasabot?” giukit niya ang tumoy sa pangutana.
“Kun wala ka pa nila masakpi,” sa kumander pa. “Sila unta ang mahulog sa mga kamot sa akong mga sakop. Giatangan na sila sa akong mga sakop sa ubos nga bahin sa dalan. Pero ila kang nasugatan. Ikaw maoy nakaanghel kanila. Ang nakademalas kay ikaw man hinuon ang naalaot.”
Wala siya motingog. Igo lang niyang gipahit ang iyang wait.
“Tungod sa nahitabo kanimo,” mipadayon ang kumander, wala na lang ihinayon sa akong mga sakop ang pagbanhig sa mga sundalo. Giseguro ka nila pagluwas.”
Diha pa untay iyang ipangutana ngadto sa kumander. Apan napukgo kini dihang may laing nahiabot. Nakugang ang iyang panan-aw pagkakita sa bayhon sa usa ka babaye. Larawan gihapon sa usa ka manggugubat ang pamayhon niini. Nagsapwang kini og plato nga gipatungan sa lutong kamote nga nag-asoaso.
“Ibutang kana diri, Ka Intay,” matud sa kumander.
Miduol ang babaye sa gihigdaan niyang lantay. Gipahimutang niini ang plato sa iyang kiliran. Ang amasona mibiya dayon sa payag human ikahatod ang pagkaon.
“K-kinsa siya?” nakapangutana siya.
“Akong anak,” maoy tubag. Usa siya kanhi ka tinun-an sa kolehiyo. Usa siya ka aktibista sa ilang tulonghaan. Apan miabot ang panahon nga wala na siya makasugakod sa pagsud-ong sa kahiwian sa mga tawong gamhanan. Mikuyog siya kanako sa pagpabukid.”
Mihilom siya. Sa iyang kahiladman dihay kahinugon nga misubol. Nahinugon siya sa maong babaye. Maanyag kini. Alang kaniya ang kalibotan nga nahimutangan niini karon dili mao ang dapit nga haom alang niini. Angay unta kining magpuyo sa mahayag nga kalibotan. Sa dapit diin anaa ang kagawasan. -- Sumpayan pa