Gula 40
Nahilom siya. Maoy mipasulabi sa iyang pamatyag ang kasakit sa tibuok niyang lawas. Nabun-og siya pag-ayo sa mga kamot sa mga sundalo nga mibanhig kaniya kagabii. Maayo gani kay wala siya tiwasi sa pagpatay.
Dihay laing mga tunob nga misaka sa payag. Mibantang sa iyang panan-aw ang bayhon sa usa ka hamtong nga lalaki. Nagsul-ob usab kini’g sapot sa usa ka manggugubat. Apan wala kini magkabiba og taas nga armas. Nasigpatan hinuon niya nga may mibagal sa hawakan niini.
“Naulian na diay siya?” nangutana ang bag-ong nahiabot.
“Oo, Kumander,” maoy tubag sa gipangutana. “Pero mora’g luya pa kaayo.”
“Tungod kana sa iyang mga bun-og,” nagkanayon ang gitawag og kumander. “Atimanon ta siya pag-ayo aron molagsik siya pagdali.”
Igo lang siyang namati sa panagsulti sa duha. Dihay hanap nga hulagway nga nag-anam og katin-aw sa tabil sa iyang hunahuna.
Miduol ang hamtong nga lalaki sa gihigdaan niyang lantay.
“Komusta ka na?” nangutana kini kaniya.
“Maarang-arang na og diyotay,” mubo niyang tubag. Unya misumpay siya sa pagpangutana. “Unsa kining dapita nga inyong gidad-an kanako?”
“Nia ka sa bukid sa Kabangbang,” maoy tubag.
“K-kinsa kamo?” nangahas ang laing pangutana paglighot sa iyang dila.
“Sama kanimo,” nagkanayon ang kumander sa ugdang nga sinultihan. “Mga biktima usab kami sa inhustisya. Sa kabangis. Sa panaugdaog. Sa kalampingan sa mga tawo nga naghupot sa gahom. Wala na kami laing kadaganan gawas sa bukid. Maong ania kami dinhi karon.”
“M-mga rebelde kamo?” gihinaykan niya pagpadayag ang pangagpas nga nag-ung-ong sa iyang hunahuna.
“Mao kanay ilang gitawag kanamo,” pintok nga tubag sa kumander. Mipitukpitok ang iyang mga mata. Gipalugdang niya ang iyang nadungog sa iyang hunahuna.
“Ako si Kumander Turo,” mihagad pagpaila ang pangulo sa mga rebelde. “Kining akong kauban mao si Ka Igme. Ikaw, kinsa ka man?”
“Ako si Gener,” paila niya sa kaugalingon. “Gener del Mundo.”
“Akong mga sakop ang nakabangal kanimo kagabii,” misugod pag-asoy ang kumander, “atol sa ilang paglaroylaroy sa kabukiran gawas ning kuta.”
Wala siya motingog. Mitaop ang iyang panan-aw sa atop nga kogon sa payag. -- Sumpayan pa