Kulbaan og maayo

Dear Tita Salie,

Have a nice day! Jjust call me Gemson, 24 years old but still single.

Ang akong problema mahitungod sa akong kaugalingon. Aduna koy naibgan nga babaye nga taga amoa ra usab. Dugay na kaayo ko nga naibog niining bayhana sukad pa niadtong high school pa lang ako ug patay na patay gayod ko kaniya, siya si Crystal.

Ug mao kini ang akong problema kay hangtod karon wala pa gyod ako makapadayag niya mahitungod sa akong gibati. Unsaon man god nga sa panahon nga makita ko siya kulbaan man ko og maayo ug dili nako kasabot sa akong kaugalingon. Sige na hinuon ko uhawon kay magsige ra man ko og lad-ok sa akong laway kun anaa na siya ug wala gayod koy mahimo nga estorya kay wala na may malitok ang akong baba.

Gusto na gayod unta ko nga makabaton og uyab, Tita, kay taas-tas na man pod ang akong edad. Apan bisan unsaon nako dili man gayod ko makasulti kun anaa na ang babaye. Unsa may angay nako nga buhaton? Palihog pasabta ko. Salamat. -- Gemson

* * *

Dear Gemson,

Kumosta? Ang imong suliran naghulagway kini sa imong pagkatawo nga low ang imong self-esteem. Kinahanglan nga ma-develop ang imong self confidence. Buot ipasabot kinahanglan ma-develop ang imong kaugalingon nga makabaton ka og igo-igong pagsalig kanimo kay ang kanunay mahitabo ubos o gamay ang imong pagtan-aw sa imong kaugalingon ug maoy hinungdan nga maglisod ka og atraka sa mga hagit nga imong masugatan niining kinabuhia.

Bisan gagmay ug simple lang unta ang imong giatubang nga bulohaton apan dako ug lisod na kini alang kanimo kay mas gamay kaay ang imong pagtan-aw sa imong self.

Makatabang kanimo aron motubo o ma-develop ang imong self-esteem o self confidene kun duna kay mga extra-curricular activities nga buhaton o apilan. Kun member ka sa usa ka organization karon gamita kana aron ka motubo pinaagi sa pagka-aktibo nimo sa imong grupo. Paningkamoti nga magsulti ka kanunay kun dunay basahon mobuluntaryo ka, dunay mga meeting nga imong tambongan mangutana o motingog gayod ka aron ka maanad.

Puyde sad ka mag-practice og sulti atubangan sa usa ka samin. Imong kusgon ang imong tingog aron imong mabati. Puyde nimo tawagon ang imong suod nga amigo o imong igsuon aron dunay maminaw sa imong pag-practice. Puyde usab nimong ipadayag ang imong pagbati pinaagi sa imong buhat. Mohatag ka sa babaye og flowers o chocolate. Imong hatagan og idea daan ang babaye aron dali na lang nimo ang pagsulti niini. -- Tita Salie