Kuwarta gikan sa basura

Kaadlawon pa gani, mibiya na si Reneboy sa barung-barong nga ilang gipuy-an. Wala na lang niya pukawa ang iyang asawa, nga maayo pa kaayong pagkahinanok, tupad sa ilang bugtong anak, nga nagpanuigon palang og upat ka tuig.

Tuyo man god niya, nga makauna pag-abot sa dapit nga maoy labayanan sa mga basura, aron daghan ang iyang mahagdaw nga mga basura, nga sarang niyang ikapatimbang ug masapian. Sama sa mga basiyong botelya, lata ug plastik.

Gusto man god siyang makatigom og ubay-ubay nga kuwarta, para duna sila’y magasto inig-abot unya sa Pasko. Mao na guy iyang pangandoy, nga mahimong mabulokon ug masadya ang pagsaulog nila sa Pasko.

Dili sama sa milabay’ng tuig, nga mingaw pa sa tirana ang pagsaulog nila sa Pasko. Nagbugnaw man lang god ang ilang abuhan niadtong higayona. Ug wala gani silay gisaloan sa pagkaon, atol sa Noche Buena. Bisan untag tinughong lang. Ug nagngiob lang sab ang ilang pinuy-anan. Kay wala gyuy gibitay, bisan usa nalang ka buok parol o bitoon.

Naatol man sab god nga gipanghilantan silang duha ug ang iyang asawa, niadtong tungora, maong wala gayuy nakapangita kanila’g kuwarta, pinaagi sa pagpamasura. Pamasura man lang god maoy ilang gisaligan, alang sa ilang panginabuhi.

Ang pangandoy ni Reneboy alagn sa usa ka mabulokon ug masadyang Pasko maoy nakadasig kaniya sa pagsayo ngadto sa dapit nga malabayan sa mga basura. Mao man guy iyang tuyo nga makapanghagdaw siya’g daghang mga basura nga sarang niyang ikapatimbang ug masapian.

Ug tungod lagi kay wala may kakumpetensiya si Reneboy, ubay-ubay gayud ang natigom niyang mga basura, nga sarang ikapatimbang. Ug masapian. Dali ra kaayo niyang napuno ang upat ka mga dagkong sako nga iyang dala.

Sa dihang sugdan na unta ni Reneboy sa pagpangarga ang mga sinakong basura, nakasigpat siya’g usa ka butang nga natabunan sa mga linabay’ng mga karton. Sa iyang tan-aw morag usa kini ka gamay’ng bag, nga ang kolor itom.

Giduol dayon kini ni Reneboy ug gipunit. Ug kalit lang nga nahasiga ang iyang mga mata, kay sa pag-abli pa niya sa maong bag, mao may iyang nakita ang mga binantal nga papel de bangko. Nga pulos tag libuon. Mga gangking pa gani kini kaayo.

Giukay pa gyud ni Reneboy ang sulod sa bag. Iyang gisusi kun wala bay mga ilhanan, nga magtumbok kun kinsay tag-iya niini. Apan wala siya’y nakita. Mga kuwarta lang gayud ang sulod sa maong bag.

Gidali-dali dayon ni Reneboy sa pagpangarga ang mga sinakong basura diha sa kariton. Ug misutoy siya’g palayo sa maong dapit, lahos na sa iyang gipuy-an. Wala nalang una niya ipatimbang ang iyang mga nahagdaw nga mga basura. Mao ra man gayuy iyang gihunahuna ang kuwartang iyang napunitan, didto sa may tapukanan.

Ug wala lang tuyoa, nga mibathay ang matam-is kaayong pahiyom ni Reneboy. Morag napanglantawan man god niya, kun unsa unya kamabulokon ug kasadya ang Pasko nga ilang saulogon. Siguro man gyud, nga magmalipayon sila sa umaabot nga Pasko. (Kataposan)