Dalaga sa Bukid

Gula 3

Mipaduol si Larry sa babaye. “Ayaw kauwaw Miss. Mas maayong mosakay ka na lang kay bug-at ra ba ning imong gilukdo,” matud ni Larry nga mialsa sa gibangan nga kahoy human niya’g kuha gikan sa ulo sa babaye.

Gibuksan niya ang baggage sa awto ug gipahiluna ang gibangan nga kahoy. “Diri lingkod sa atubangan nga lingkoranan,” giingnan ni Larry ang babaye human niya kabuksi ang pultahan.

Human makapahiluna si Larry sa lingkoranan atubangan sa manobela, gitamakan niya ang iyang gibutang sa neutral nga kambyada. Hinay-hinay nga miaginod ang kotse hangtud nga nagkakusog ang dagan.

“Nagub-an ko didto sa unahan Miss mao nga nagpaaginod na lang ko pagpadagan, apan motawag na ko karon sa akong mekaniko. Ako diay si Larry, ikaw unsay imong ngalan?” gipangutana ni Larry ang babaye.

“Jenny,” mubo nga tubag sa babaye. “Mekaniko man ang akong Papa basin og makatabang siya nimo Lar.”

Gibati og kalipay si Larry pagkadungog nga mekaniko diay ang amahan ni Jenny. “Diha lang iparking tupad nianang usa ka multicab,” giingnan ni Jenny si Larry.

Dihang napahiluna na ni Larry ang awto daplin sa karsada, una siya nga nanaug ug gibuksan ang pultahan sa gilingkoran ni Jenny. May tawo nga miduol ug nakita ni Larry nga miamen si Jenny.

“Pa, gipasakay ko niya kay naagian ko sa karsada ug nangita siya’g mekaniko,” giingnan ni Jenny ang amahan. “Noy, naabereya ko didto sa unahan. Mikalit man lang og kapawong ang makina.”

“Kuhaon nako ang kahoy sa baggage,” giingnan ni Jenny si Larry. “Aw Oo tuod no? Hapit ko makalimot da,” ni Larry pa.

Gihiling sa amahan ni Jenny ang sakyanan. May gitangtang kini nga mga roska dapit sa palapad. Dihang natangtang na. “Uy, nabugto man ang timing belt. Maayo lang og wala mangabali ang rocker arm sa makina,” matud sa mekaniko.

Gitangtang sa amahan ni Jenny ang mga roska sa tabon sa makina sa sakyanan. “Daan pa lagi ko Dong, nangabali g’yud ang rocker arm. Imo diay ning gipugos og paandar?”

“May kwarta ka ba diha Dong? Magpapalit lang ta ugma sa mga amigo nako nga konduktor og mga PUJ nga mobiyahe sa ciudad, dali ra ni. Ang nangabali nga pyesa, duna ko’y magamit diha kay naa ko’y makina nga matangtangan,” matud sa amahan ni Jenny.

“Guba g’yud Pa?,” napalingi si Larry pagkadungog sa tingog. Paglingi niya, nakita niya nga gwapa na kaayo si Jenny. (Sumpayan)