Tsunami nga way baha

Baliyon baya ka Nay Noring, nga magminyo ka og usab ni Noy Masyong?” Misinggaak sa tumang kalanog ang akong tingog ning kasayo pa sa kabuntagon. “Maliso pay buko sa kawayan ang akong hukom Eser!” ni Nanay pa Noring nga mapahiyomon nga mitubag kanako.

Dili man god tiaw ang akong kalibulong, nga wa pa gani intawon mahubkasi si anhing tatay Geyong, nanguwag na kining akong inahan.

Dili man god ikalimod nga ning among balangay sa Pitalo, nabaniog na nga sa katiguwang na sa biyuda kong inahan ... nagplano pa diay nga magminyo og usab kang Noy Masyong nga usa usab ka biyudo nga amo ra usab nga silingan.

Gabii human sa kasal nila ni Nanay Noring ug Manoy Masyong, wa akoy maayong kinatulgan. Mahadlok man god ko nga mahinaykan unya ang tiguwang ko nang inahan, nga ang lawas labaw pa sa bayingbaying?

Mikanaas ang pikas sibay. Milugapak ug milinog. Gipaduol ko ang akong dunggan, simpig sa among bungbong nga amakan sa may pikas nga sibay, nga gihigdaan sa bag-ong magtiayon. May inagulo akong nadunggan. Sa akong hunahuna si Nanay na gayod karon Noring ang nag-udhak.

Baya ... may nabati ako nga tingog nga nagkanayon.

“Yonggggg ... maluoyyy kaaaa .... hinayhinaaaa ... intawonnn kayyy hapdosssss .... kaayo!”

“Unsa goy hapdos Noring ... nga hilabihan man nga lugaka?” ni Noy Masyong pa nga nagkanguhal ang sinultihan.

Way hunong ang linog. Gipanguyawan na hinuon ako ... kun basin sama sa Japan ... may tsunami nga mibanlas sa kakusog.

Nanuktugaok nalang ang mga manok nga namatog sa may sanga sa kamansilis ... apan wa gayoy bisan umog na lang sa kabasa nga midagayday sa may pikas nga sibay nga akong gihigdaan.

Apan ngano man tuod nga nagpunay man og kauyog ang among balay nga karaan? Naglugapak god ang busaog ug nauyog ang tugas nga haligi?

Wa akoy maayong kinatulgan. Hangtod sa pagkabuntag ... mao na lang ang akong nabatian nga nagbagulbol si Nanay Noring, sa inantigong diskarte nga gibuhat ni Noy Masyong kaniya nga akong nabatian nga nagkanayon.

“Kumagko na lang sa akong tiil Noring, ang akong gikulkog kay bisan unsaon sa imo na karong pagkatiguwang ... way baha sa tsunami ... nga modagayday aron mobaha sulod sa sibay!” (Kataposan)