Dalaga sa bukid

Nagduka si Larry nga nagmaneho sa iyang kotse balik dinhi sa Sugbo. Gikan siya nga mibisita sa iyang higala didto sa Samboan, nga nahimutang tumoy nga bahin sa habagatan sa probinsya.

Katulgon g’yud siya nga nagmaneho. Mihukom si Larry nga mo-parking sa daplin sa karsada ilawom sa kahoy’ng acasia aron mopahuway kadiyot. Apan nakurat siya kay dunay sakyanan nga kusog kaayong nagdagan nga miagi sa iyang tungod.

May nahuna-hunaan si Larry. Gibalik niya sa naandang posisyon ang iyang lingkoranan ug dali nga gipaandar ang makina sa iyang kotse. Diha-diha nga gigukod ni Larry ang sakyanan nga kusog kaayong nagdagan.

Ang tumong niya mao nga gusto niyang ikaginukdanay ang sakyanan nga kusog kaayong nagdagan aron nga mokagiw ang iyang duka. Tuod man, nakit-an niya sa unahan ang sakyanan nga nag-asu-aso ang luyo.

Gitamakan pa ni Larry ang gasolinador sa kotse ug misutoy pa g’yud kini pag-ayo. Diha na g’yud si Larry sa luyo sa sakyanan nga iyang gigukod apan nakabantay ang drayber sa pikas sakyanan.

Mikusog usab ang dagan sa sakyanan. “Yati, kusog-kusog sab modagan ning kotseha da,” matud ni Larry sa iyang huna-huna. Mi-change gear si Larry sa tarsera ug dayon gihapak sa kwarta-martsa.

Halos ipapuok ni Larry ang gasolinador sa iyang sakyanan. Daw naglupad na ang sakyanan ni Larry. Nag-ampad na sila ug ang laing sakyanan. Apan kalit lang nga daw naputlan og usa ka ugat ang sakyanan ni Larry.

Napawong ang makina ug gibiyaan siya sa gikaginukdanay niya nga kotse. “Dimalas! Hu!” nagpangagho si Larry nga mipakagot sa iyang bag-ang. Nagdagan gihapon apan napawong na ang makina.

Sa daplin sa karsada, gisuwayan ni Larry pag-start pag-usab ang makina, apan wala na g’yud moandar. Naglibog si Larry kun unsay buhaton. Bisan og giunsa pagpa-start ni Larry dili na moandar ang kotse.

Mingaw ra ba ang dapit nga iyang naabereyahan. Wala’y mga balay sa duol. “Maayo pa og sayo ko nga migikan da,” matud ni Larry sa iyang huna-huna samtang gitutokan niya ang iyang relo. Alas kwatro na sa hapon.

May nakita siya nga tulo ka batan-on nga nagpas-an og kahoy para sugnod nga nagpaingon sa iyang nahimutangan. “Naguba sir?” gipangutana siya sa usa ka batan-on. “Mingaw ra ba dinhi sir, walay balay,” matud sa laing kauban. (Sumpayan)