Mga sigbin ang kauban ni Leopoldo

Dato si Leopoldo ug ang iyang suwerte nagagikan sa bahandi nga iyang nakubkoban. Matud pa sa mga tabitabi nga lima kuno ka mga kaban nga puno sa mga bulawan ang naa karon ni Poldo.

Ug ning mao niyang kahimtang mora’g wala pa kuno madispatsar ang ubang mga kaban kay gusto ni Poldo nga mamalit o di ba magpatukod siya’g daghang mansion nga adto niya tukora sa lainlaing dapit dinhi sa kapupud-an.

Karon lang, gisugdan na ang iyang bag-ong mansion sa pagtukod. Ug kun mahuman na kini magpatukod na pud siya’g laing mansion. Hilig si Leopoldo o Poldo nga makatag-iya’g daghang balay nga mansion. Ug nakanindot ni Poldo kay ulitawo siya.

“Suwerteha sa babaye nga maoy maasawa ni Poldo no, Sitang?” ni Imok nga maoy tag-iya sa baligyaan og mga ligid sa mga sakyanan nga naa mahimutang sa eskina dinhi sa ilang baryo.

“Aw, o, uy, puwerte gyung suwerteha, Imok. Tiaw moy labaw pa sa usa ka bilyonaryo ka dato kana si Poldo...” ni Sitang pa usab nga asawa ni Imok.

“Pero ang grabe ka suwerte mao si Poldo kay nakakawot siya’g mga kaban sa bulawan...”

“Matay, no, Sitang, kun ako pay nakakubkob sa maong mga bahandi, wala na sitting pretty na tang duha ron...” mipahiyom si Imok nga mipasiaw.

“Maupaw na lang ko’g pangubkob apan wala gyud ko’y nakubkoban nga matawag nga mga butang nga gilubong sa mga karaan. Aw, naa man ko’y makawtan pero mao lagi panaksang boak nga antik...”

“Segun ra ba sa tabitabi dinhi sa ato, usa kuno ka mangtas nga dato ang mihatag og mapa kang Poldo nga nahimo niining higala,” hinay ang tingog ni Sitang.

“Tan-awa ra gud kana si Poldo, di ba na usab ang iyang bayhon ug hitsura. Midaot kini siya ug namiyahok ang nawong. Sotero kuno ang ngalan sa maong mangtas. Duna man gu’y nakaila ni Sotero nga silingan nila didto sa England...”

“Basin og natakdan na kana si Poldo, Sitang,” mora’g nahasiga ang mga mata ni Imok. Kauban man gud sila si Imok niadto sa pagpangawot og mga treasure apan si Poldo ang gisuwerte. Ug namatikdan ni Imok nga dili na motagad si Poldo kaniya labi nang nadato na kini karon.

Tuod, nahuman ra gyud ang mansion ni Poldo. Nindot kaayo ang porma niini. Ug pagkasunod buwan nadungog nga si Poldo naminyo og usa ka babayeng maanyag ug matud pa, anak kuno kini ni Sotero. Sa hilom may kaligutgot si Imok kang Poldo kay garboso na kaayo kini karon.

Hasta gani ang ilang mga silingan mora’g naglagot sa hilom kang Poldo. Milabay ang lima ka buwan sukad naminyo si Poldo ug kalit lang nadungog nga ang asawa ni Poldo namatay. Kun unsay sakit nga maoy hinungdan sa pagkamatay niini, wa nahibawo.

Unya, nagubot na gyud ang mga lumolupyo dinhi sa balangay sa Pulang Dapdap kay duna nay gipangpaak sa mga sigbin. Ug inig kahuma’g paak modagan kuno kini paingon sa mansion ni Poldo. Dili hinuon mangamatay ang mapaakan dihadiha apan maghigos kini ug hangtod nga mamatay.

“Sitang, panid-an nako si Poldo, moadto ko sa iyang mansion, maayo ron kay wala dinha si Poldo kay tua sa Davao,” ni Imok pa sa hinay nga pagkasulti. “Akong sutaon kun unsay naa diha sa mansion ni Poldo ug nganong wala man gyud siya’y sulogoon o katabang nga kuyog niya...”

“Unya, ikaw rang usa, Imok?” nabalaka si Sitang.

“Ako ra gud, magdala lang ko’g tinalinsang bagakay ug boronse nga baraw,” miingon si Imok. Tuod, nianang pagka-gabii, gisaka ni Imok ang mansion ni Poldo. Mingaw ang mansion nga ang kasikas lang sa mga dahon sa kahoy nga gihuyop sa hangin ang mabati ni Imok matag karon ug unya. Didto siya moagi sa dakong sanga sa kahoy nga mahogany nga mibawog paingon sa wala kasirhing bentana sa mansion.

Sa didto na si Imok sa sulod sa mansion sa itaas, nahibulong siya nga siga man ang tanang suga niini nga wala man unta si Poldo kay tua sa Davao. Apan nakugang na lang siya dihang may miabli sa pultahan sa usa sa mga lawak ug migawas si Poldo. Mipahiyom siya ni Imok nga miabiabi. “Mapangahason ka ra kaayo, bay Imok,” ni Poldo nga mora’g siga na kaayo’g mga mata.

“Nia, ni-nia lagi ka, Poldo. Di ba tua ka man sa Davao?” gibati’g kakuyaw si Imok.

“Oo, pero, dali ra kong makabalik kay molupad lang ko,” ni Poldo pa. “Karon, akong ipakita nimo ang akong mga kauban dinhi sa mansion, bay Imok. Gutom na kaayo na sila’g preskong unod sa tawo...”

Nahaatras si Imok sa iyang nakita, kay nanungha ang kapin sa trayenta ka buok nga sigbin. “Sige, mga binuhi ko, pagtagbaw mo niining mapangahason, tilawi ninyo ang iyang unod, he, he, he...” milanog ang kagiki ni Poldo.

Ug kay abli man ang bentana hinurot ang tanang kusog ni Imok midagan ug unya milayat sa bentana ug pagtugpa niya sa ubos gialirongan na siya sa daghang mga sigbin. Misinggit si Imok sa kalisang. (Kataposan)