Aron makabayad sa kuryente

Sayo pa kaayo sa buntag diha na ang tigbasa sa metro sa kuryente tungod kay ang balay, miadto na sa tulo ka bulan nga wala pa makabayad. Diha sa hunahuna niini nga iya gayong putlan ang tagbalay sa kuryente. Kun magmakuli kini paghatag sa iyang obligasyon.

Ubay-ubay na ang panahon nga wala kini mohatag. Gani, ang usa ka meter reader nga iyang napulihan, naglagot gayod sa tag-iya sa balay kay duna gayod kini pagka gahi’g ulo.

Mao nga buntag sayo pa, diha na siya basin dili pa kini makalakaw og sayo. Sa iyang pagpanuktok, dihadiha mibukas dayon ang pultahan ug ang tag-iya sa balay mao ang mi-entertain kaniya.

“Unsa Mam, dili ba gayod kamo mobayad sa inyong obligasyon?” pulong sa meter reader dungan sa pagpakita sa lista sa mga bulan nga wala makabayri. “Dunay order karon sa among opisina nga dili na kami mohatag sa lugway.”

“Dong, pasensiya lang usa, Dong, kay wala pa muabot ang akong bana. Dugay na bitaw ang paabot kaniya apan wala pa gayod makauli kay layo man gud siya maasayn,” pulong sa Ginang nga morag nagpakita og kakiat ngadto sa meter reader.

“Sagdi kay nag-text man gahapon nga muabot siya karong adlawa ug segurado nga mabayran na namo ang among obligasyon.”

“Sige Mam! Mobalik gayod ko karong hapon.”

Milakaw ang meter reader apan, diha sa iyang hunahuna ang kaguwapa sa Ginang. Sa iyang banabana, nag-edad palang kini’g kawhaan kapin. Nadani gayod ang meter reader kay pagkanindot sa lawas niini kansang bugdo sa dughan, daw bulkan sa Mayon nga makada sa mga tumatan-aw.

Samtang nagbaklay ang meter reader, diha sa iyang hunahuna nga balikan dayon ang Ginang pag-abot sa udto. Matud pa sa iyang kaugalingon kun dili gayod makabayad kini iyang danihon sa bisan unsang paagi mosugot lang para makabayad sa bayranan.

Matud pa sa meter reader, nga wala siya’y kahadlok kay ulitawo man siya. Mosugot man usab siya nga tabanon ang Ginang kay gibati gayod niya ang kaibog niini.

Namatikdan nga morag migimok ang iyang kahiladman dihang nagpakita kini sa maputi niini nga dughan dungan sa maputi niini nga paa dihang gituyo niini sa pagwalis ang panty. Pastilan, nakapanlad-ok siya sa iyang laway tungod sa hilabihan kaibog.

Tungod sa pagduhiraw sa iyang hunahuna, wala na ganahing motrabaho ang atong bida. Daw dili niya mahikalimtan ang pamayhon sa Ginang. Pagka guwapa gayod niini. Diha sa ilang lawak, gusto mohinanok apan dili nila mahimo.

Hangtod nga miabot na ang kaudtohon. Ug sa pag-abot sa ala-una ang takna sa hapon, nangandam na siya para molakaw. Migamit siya’g pahunaw tungod sa tuyo nga makigsulti sa Ginang ug kun mosugot, bisan kun ma-thank you ang kuryente. Nagtuo usab siya nga wala pa ang Mr. niini.

Misakay siya sa iyang service nga motorsiklo kay mora’g layo-layo pa ang balay sa Ginang. Wala nay lain pang hunahuna kun dili mao nga andam siyang kombati sa higayon nga magkita sila sa Ginang.

Dul-an sa katloan ka minuto ang milabay miabot na siya sa tugkaran sa balay. Mingaw kaayo ang palibot kay wala’y tawo sa gawas kaha gibati og kaalindanga sa panahon. Bugnaw kaayo ang huros sa udtohong huyuhoy. Ug sa hinay-hinay, misulod siya sa balay nga mainampingon. Diha pa gani kadtoy usa ka iro apan daw wala kini maglihok apan mipakiway sa iyang ikog timaan nga usa ka higala ang miabot.

Ug pangandam sa kombate, gihubo niya ang iyang karsones kay pagtuo nga andam na usab si Ginang ug nagpaabot na usab kaniya niadtong mga taknaa sa kahaponon. Taod-taod lang, nanuktok siya sa pultahan nga wala nay karsones. Apan, naunsang pagka unsaa nga sa iyang pagbukas sa pultahan dili man si Ginang ang mibukas kun dili mao man ang bana nga haskang isoga ra ba kaayo.

“Hoy! Naunsa ka bang tawhana, nganong naghubo ka man sa imong karsones? Unsa man ang imong pagtuo ning among balay kasilyas?” pulong sa bana nga gibastosan sa naghubo nga meter reader. “Hala gawas.”

“He-he! Sir, ikaw diay, Sir,” pulong sa atong bida nga medyo nakurat kaha wala magtuo nga mao kadto ang mahitabo.

“Sir, kun dili gani kamo makabayad sa kuryente, ihian ko kining inyong balay.” 

Ug sa hinayhinay, milakaw ang tigbasa sa kuryente nga nagpaminti sa kalagot. (Kataposan)