Dear Tita Salie,
Have a nice day. Just call me Jeric, 26 years old and still single.
Naa koy nakaila nga babaye, tawga lang siya og Dina, 23 years apan duan siya’y ka-live-in.
Nagkauyab gayod mi ni Dina sa tago. Ingon niya nga gikapoyan na siya sa iyang kapuyo karon kay magsige ra man sila og away. Matud pa niya gusto na niyang biyaan ang maong lalaki. Wala paman sila makasal, so dali pa kuno ang pagbuwag nila.
Nahigugma ra ko ni Dina, Tita, ug love na sad ko niya. Bisan kun duna siya’y kapuyo apan nangita gayod mi og paagi nga magkita. Niingon siya nga lahi daw ko sa iyang kapuyo kay malipayon siya uban kanako.
Nisugyot si Dina kanako nga kun madawat pa nako siya, bisan may kapuyo na siya iyang biyaan ang iyang kapuyo ug kami nalang duha ang magkuyog. Mao kini ang nakahasol nako karon, Tita. Palihog pasabta ko. Daghang salamat and God bless. -- Jeric
* * *
Have a nice day usab nimo, Jeric ug kumosta? Sayon ra ang imong problema kay anaa ra gayod kanimo ang solusyon. Apan nakasabot ako sa imong punto kun nganong imo kining gipadala dinhi sa atong column sa pasabta. Gusto ikaw nga makaseguro sa imo unyang hukom mahitungod sa imong sitwasyon.
Dako-dako o bug-at kana sa imong kinabuhi. Usa ka gamay nimong sayop mahimong imong antoson sa tibuok mong kinabuhi. Busa aron wala’y angay basulan imo kining hinuktokan sa makadaghan.
Dali ra ang pagtambag ug pagsulbad sa problema sa uban apan kun ato nang problema ang atong atubangon lisod ang pagkab-ot sa solusyon. Tungod dili kita gusto nga masayop ug mag-antos sa atong kinabuhi.
Ang angay nimong buhaton mao ang pagtan-aw og maayo sa maong sitwasyon ug mga tawo nga apil niini. Nahigugma ka ba gayod nianang bayhana? Andam ka ba nga ipaglaban siya? Madawat ba nimo ang iyang pagkatawo nga may kapuyo na? Kun mag-away mo, kay dili ra ba kalipay kanunay ang masinati sa kinabuhing minyo, dili kaha nimo ungkaton ang iyahang kisinatian sa kinabuhi? Kinahanglan nga segurado ka sa imong pagbati ngadto kaniya kay aron usab dili siya makaluluoy sa kauwahian. Sa imong paghukom ayaw kalimti ang kaayohan usab sa maong babaye. -- Tita Salie