Boy ug Maid

Gula 6

Gihapuhap ni Lino ang hubo nga lawas ni Precy nga misugod na paglihok. Taud-taud, mibuka ang mga mata sa dalaga. "Ahhh, tabang!" napasinggit kini sa kakuyaw, apan pagkakita nga si Lino ang mihikap kaniya kalit kini nga migakus sa ulitawo.

"Lino, Lino, giamong-amongan ko ni sir Marco," naghilak ang dalaga. "Wala madayon ang iyang yawan-ong tinguha kanimo Prec, naluwas ko ikaw gikan sa iyang mga kamot. Naa tan-awa, nagbuy-od na siya sa sawog," matud ni Lino nga mitudlo ngadto sa agawon nga naghayang nga wala na maglihok.

Nagginaksanay ang boy ug ang maid. "I love you Precy. Natuman nako ang imong gihangyo nga luwason ka gikan sa mapahimuslanon nato nga agawon," giingnan ni Lino ang dalaga. "I love you too Lino, salamat nga naluwas ko nimo," ni Precy pa.

Takulahaw lang nga nag-ukobay dayon ang masi'g nila ka mga ngabil. Wala tuyoa ni Lino nga nahapuhap niya ang hubo nga lawas sa dalaga. Inanay kini nga nagsugnib og kainit ni Precy.

Nagkainit ang ilang pagparayganay. Kalit lang namingaw ang tibuok lawak. Bisan og nagkapuliki si Lino sa pagromansa sa dalaga, apan panagsa niyang gipasiplatan si Marco nga nagbuy-od sa sawog.

Takulahaw lang nga giharian sa tumang kamingaw ang tibook lawak ug maoy mihari ang hangos nila ni Precy ug Lino.

"Pag-ilis na Precy, mo-report dayon ta's kapolisan sa nahitabo nga pagtinguha ni Marco paglugos nimo." Nanggawas sila sa kwarto. Gibitbit gihapon ni Lino ang tubo sa tubig nga gigamit niya pagbunal sa agawon.

Mikontak dayon si Precy sa kapolisan. Taud-taud, nangabot ang mga polis ug gisusi nila ang kwarto. Didto nila mahibaw-i nga patay na diay si Marco nga nagbuy-od sa sawog human maintimano pagkaigo ang iyang ulo sa pagbunal ni Lino.

Giadto sa mga polis ang kwarto sa asawa ni Marco ug gipahibalo sa nahitabo. Igo lang mihilak ang asawa ni Marco. "Tinuod kana Sir, nakadungog ko ganina nga nagsige og singgit nga nangayo'g panabang ang akong maid. Nahibawo usab ko nga kaniadto ra nga naibog si Marco ni Precy."

Wala na mokiha ang kabanayan ni Marco ngadto ni Lino. Nakasabot sila nga sad-an g'yud si Marco ug igo ra nga miluwas si Lino sa maid nga buot unta among-amongan sa agawon.

Human malubong si Marco, giduol nila ni Precy ug Lino ang agawon nila nga babaye. "Ma'am, nalubong na man g'yud si sir Marco, mopahawa na lang mi dinhi." (Sumpayan)