Maunongon Ang Gugma

Gula 79

 Naneguro lang ko,” pasabot ni Jeffrey. “Aron wala gayo’y usa nga makatultol kun hain kita magtago. Maong maglakaw na lang kita paingon sa simangan.”

Sa hapit na sila moabot sa may simangan, dihay motorsiklo nga misaylo kanila. Gawas sa drayber, may laing duha ka tawo nga nag-angkas niini nga maila nga gikang nangompra sa lungsod kay nanagdala man usab sila og mga plastic nga gisudlan sa ilang mga pinalit.

Milingi ang usa sa mga pasahero sa habal-habal, kaha nahibulong kun nganong nagbaktas lang sila.

“May barangay pa tingali diha sa unahan, no,” ni Danica pa, “kay may mga pasahero pa man nga magpahatod og habal-habal ngadto.”

“Posible,” mao ray tubag ni Jeffrey.

Ug wala madugay, mitipas na sila sa may simangan paingon ngadto sa bukid.

“Segurado ka ba niining nakuha mong impormasyon, Kirat?” Gisukit ni Randy Unson ang iyang sinaligan.

“Dili mahitabong masipyat ko, Boss,” nagkanayon si Kirat. “Nasundan gayod sa akong sinugo si Danica ug ang kauban niining lalaki.”

“Mao tingali kadtong lalakiha ang giingon ninyong pugante nga midagit kaniya,” ni Randy pa. -- Sumpayan pa