Public disturbance sa Pasko

Kasadya ning taknaa. Dapit sa kahimayaan ... nasiak ang kamingaw ning alas onse sa kagabhion sa kabalayan sa baryo Clavegero ning dakbayan. Lima ka managbarkadang lalaki ang nanaygon tungod gyud sa balay ni Noy Doming usa ka biyudo nga nag-inusara na’g puyo. Apan ang duha niya ka anak nga puro na minyo naa ra po’s duol sa iyang balay nagpuyo. Duha pa lang ka linya sa ilang kanta, namawong sa suga ang mga kabalayan. Ikaduha ang balay ni Noy Doming sa silingang habig gikan sa gate sa Clavegero Central School. Pensiyonado si Noy Doming sa GSIS. Kay sa wa pa niretiro, dugay siyang drayber sa garbage truck sa DPS.

Pagkahuman sa unang awit, wa pa gyud nangabli sa pultahan si Noy Doming. Nagsininyasay ang lima nga dungagan nila’g ikaduhang awit. “Ania kami, ning gabii sa among pagdaygon...” awit sa lima. Nikalit og abli si Noy Doming sa pultahan mayor padulong sa terasa sa iyang bunggalo nga nag-atubang sa karsada. “Husto na! Husto na!” ni Noy Doming nga nigawas ug nibarog taliwala sa terasa sa iyang balay. Niurong ang lima sa pagkanta. Nahilom. Si Danny ang naggunit og sista. Si Dongdong, uke. Si Yono, pandaritas. Si Sitoy may duha ka kutsara nga gipakongpakong. Si Mario, may gulonggulong. Puro sila estudyante sa kolehiyo nga nagkasabot manaygon panahon sa Christmas vacation.

“Di ba sa panahon sa Pasko magbayloay man ta’g regalo? Sa Iningles pa exchanging gifts? Kining inyong gihimo, pakilimos man na! Kun di pa ron Pasko, angay mo ikiha og public disturbance!” ni Noy Doming sa masuk-anong pulong. “Ngano man Noy Doming? Unsa may sala namo?’ ni Danny nga maoy liderlider sa grupo. Kini silang lima manganta lang panahon sa Pasko. Hadlokan mokanta. Apan kay nagkasabot manaygon, nag-inom una sa wa pa nanaygon. Pagka-init-init na’s ilang mga dunggan, nanaygon dayon. “Puwerte ninyong yabaga manganta! Sakit sa dunggan! Nawala na ang tema sa Pasko nga magbayloay og kalipay” ni Noy Doming. Nakapangawot sa ulo ang lima.

“Ang insakto nga panaygon, manganta mo aron malipay ang makapaminaw sa inyong kanta. Busa nakahatag mo’g kalipay. Ug ang nalipay sa inyong kanta, mohug sa inyong panaygon aron sab mo malipay. Karon, one-sided man ning inyong panaygon. Kamo ra may malipay. Para nako, pakilimos man lang ni sa panahon sa Pasko,” dugang ni Noy Doming. Nagkatinan-away ang lima. Way nasulti sa usa’g-usa. Apan nakita sa ilang mga lihok ug tinan-awan nga nidawat sa saway sa tiguwang. Daw nakaingon sila sa ilang hunahuna nga insakto si Noy Doming. “Pero bisan pa man sa among kasamok Noy Doming, ang amo lang nga nanghinaut mi ning Pasko nga ikaw naa sa maayong panglawas ug panghunahuna sa tibook tuig ug sa mga katuigang umaabot. Mao ra nay among mensahe pinaagi sa among awit. Bahala’g yabag” ni Danny. Nakapahiyom na. “Salamat sa inyong maayong mensahe” ni Noy Doming. “Busa, Merry Christmas na lang diha kanimo” timang ni Dongdong. “Same to you” ni Noy Doming nga nakapahiyom na.

“Same to you ra gyud diay madawat namo?” ni Yono nga naghinay og dakoldakol sa pandaritas sa iyang walang palad. “Kadiyot lang” ni Noy Doming nga nibalik og sulod sa iyang balay. Naghinamhinam ang lima nga naghulat sa ihulog sa tiguwang sa ilang panaygon.

Nigawas ang tiguwang nga nagbitbit og gamay nga libro nga mora kabag-a’g Reader’s Digest. “O niay akong librong pinalit nga iregalo unta nako sa akong apo. Inyo na lang ni. Singkwenta pesos akong palit ini. Ang ulohan ini “How To Improve Your Singing Voice” sunod Pasko, kun makauyon na ko’s inyong tingog, hulgan ta mo’g usa ka libo. Panaad na” sa tiguwang.

Gidawat ni Danny ang librong gitunol. Niduko kay gitan-aw pag-ayo ang cover sa libro nga lalag og bulok,. “Usa ka libo ka unsa, Noy?” ni Danny. Niyahat. “Usa ka libo ka pesos. Apan kun yabag gihapon mo, usa ka libo ka bawang!” ni Noy Doming. Nibalik og sulod sa iyang balay. Nitalikod ang lima ug nagkasabot nga sa sunod Pasko na lang sila manaygon. (Kataposan) (Sa gusto’g libreng konsulta, dad-a ning pahina sa opisina sa tagsulat. Iatol og Sabado sa buntag)