Ungo ba si nang Torya?

Manindahay’g tabako si nang Torya sa Taboan matag adlaw’ng Lunes. Duna siya’y duha ka anak babaye. Si Saning ug Esper. Si Saning maoy abag ni nang Torya sa paninda’g tabako matag Lunes samtang si Esper nagmaestra.

Uyab ni Esper si Tonyo nga usa ka enhinyero sa ilang dapit. Sikit kaayo sila ug kanunay’ng kuhaon ni Tonyo sa eskuylahan si Esper.

Naandan na ni nang Torya kun mag-inusara lang ang paglaktud sa awaaw nga agianan sa kimba nga gilibutan sa kalibonan. Magkiangkiang lang maglakaw. Bisan tuod tigulang na ug takiang ang linaktan, lig-on pa gihapon si Nang Torya nga maglukdo sa binandol nga tabako. Apan kun motumaw na gani ang iyang sakit, ituy-od ang tiil. Magtuwad lang intawon nga malibang. Sakit gyud ang rayoma, oy...!

Sa laing bahin, si Torotoy anak pinaangkan nga medyo Mongoloid ang dagway. Lagi kay kugihan, gisagop siya sa iyang iyaan nga si Polonya sukad mamatay ang iyang inahan.

Sapian si Polonya nga giabagan sa iyang bana nga si Denciot sa ilang negosyo nga tuba. Sagad ikabagat ni Torotoy si nang Torya nga maglukdo sa binandol nga tabako sa mingaw nga agianan sa Kimba. Bisan nagtakiang ang linaktan, tagdon gyud ni nang Torya si Torotoy nga gikan sa uma ni Polonya/Denciot ug tagaan pa gyu’g tabako si Torotoy. Suod nang higala si nang Torya ug Torotoy...!

Kilumkilum nang miagi si Torotoy sa awaaw nga agianan sa Kimba. Gikan siya sa uma nga iyang giatiman. Samtang naglakaw, may nabati siyang kasikas ilawom sa kalibonan. Way kahadlok nga gisuot ang kalibonan ug iyang gisusi ang hinungdan sa kasikas. Didto sa unahan, may nakita siyang anino sa babayeng tigulang. Mabinantayong gisuhid ni Torotoy ang anino ug tataw nga nakita niya ang bayhon sa tigulang babaye.

“Nang Torya ikaw diay...?” Sangpit ni Torotoy.

“Oo, ‘Dong Torotoy...! Ngano man..?” Tubag ni nang Torya dungan ang pangilo sa sampot.

“Unya, nganong nagtuwad ka man...?” sukna ni Torotoy sa dakung kahibulong.

“Aaay, sakit kaayo ang akong tuhod sa rayoma, oy...!” Matud pa ni nang Torya ug dayong lakang kiangkiang gawas sa kalibonan.

“Yuna pa Nang, tagai ko’g tabako bi...!” Nangayo’g tabako kang nang Torya si Torotoy. Gikuot sa bulsa ni nang Torya ang tabako ug gitunol ngadto kang Torotoy.

“Ihatud tika sa inyo...?” Matud pa ni Torotoy human madawat niya ang tabako apan mibalibad ang tigulang sa tanyag ni Torotoy.

Pagkasunod adlaw, sipa pa sa liti sa udtong tutok nga ungo si nang Torya kay nakit-an ni Torotoy nga nagtuwad gahapon sa kilumkilom. Naabot sa pandungog ni Tonyo ang maong balita ug way daghang pangutana gibuwagan dayon ang uyab nga si Esper nga anak maestra ni nang Torya.

Pastilan, tinuod ba nga ungo si nang Torya...? Lain lang ang sabot sa mga tawo sa Kimba sa nakita ni Torotoy bahin kang nang Torya. (Kataposan)