Boy ug Maid - Gula 4

Salabtunon kaayo ang ilang mga tinan-awan ni Precy ug Lino. Wala makaharong si Precy, miduko siya ug mibiya, dayon mipaingon sa kusina aron magluto.

Migawas si Lino sa balay ug mipaingon sa grahe. Gipadayon niya ang pagpanglimpyo sa palibot sa balay sigun sa gisugo kaniya ni Marco. Didto si Lino sa luyong bahin sa balay nadungog niya ang sirbato sa sakyanan sa gawas.

“Hala! busina karon sa awto ni Sir,” matud ni Lino nga mikaratil og dagan paingon sa gate. Gibuksan niya ang gate ug misulod ang sakyanan ni Marco. Nanaug si Marco gikan sa sakyanan ug gitawag si Lino.

“Paliti ko’g tambal Lino kay mora’g lain ang pamati nako sa akong lawas. Didto pagpalit og tambal sa downtown ha kay aron pagsiguro nga dili fake ang imong mapalit,” matud ni Marco.

Dali kaayo nga nag-ilis si Lino. Mibiya dayon siya sa balay aron pagtuman sa sugo sa iyang agawon. Misakay dayon siya’g PUJ paingon sa downtown, apan nahibulong siya pag-ayo.

Nakapangutana si Lino sa iyang huna-huna kun nganong sa downtown man g’yud siya papaliton og tambal ni Marco kun tinuod pa nga galain ang lawas niini aron unta makainom dayon siya’g tambal. May botika man nga duol ra.

May kalit misantop sa huna-huna ni Lino. Kalit siya nga nanaug gikan sa PUJ nga iyang gisakyan paghitungod niini sa usa ka botika atbang sa Vicente Sotto Memorial Medical Center.

Human mapalit ni Lino ang tambal nga gisugo ni Marco, misakay dayon siya og PUJ balik sa Banawa. Sanglit gidala man ni Lino ang yawe sa pultahan sa gate, sayon ra siya nga nakasulod nga wala na mo-buzzer pa.

“Tabang! Ahhhhppp,” nakadungog si Lino og singgit nga daw wala matiwas. Daw gisap-ongan ang baba. Gikulbaan siya pag-ayo. Misantop sa iyang huna-huna nga tingog ni Precy ang iyang nadungog.

Gikan sa kwarto ni Precy tupad sa kusina ang gigikanan sa tingog nga nangayo’g tabang. Nagkuba-kuba ang dughan ni Lino samtang mipaduol sa pultahan sa kwarto ni Precy.

“Ayaw tawon Sir, malooy ka, ayaw tawon,” tingog ni Precy nga naghilak ang nadungog ni Lino nga nagpakilooy.

Nakasabot na siya. Si sir niya Marco ang anaa sa sulod sa kwarto ni Precy ug buot niini among-amongan ang iyang maid. Misantop sa huna-huna ni Lino nga luwason si Precy.

Nahinumdom siya nga nagpakiluoy kaniya si Precy nga tabangan siya nga dili magmalampuson si Marco sa dautang tinguha niini kaniya. (Sumpayan)