Wala'y gahi nga pan sa init nga kape

Usa ka adlaw niana didto sa mall, nag-shopping si Unyot aron sa pagpamalit og bag-ong mga bisti. Samtang naglakaw-lakaw siya aron sa pagpamili og bisti nga iyang paliton, adunay kalit lang nibangga kaniya ug sa iyahang paglingi, ang sipa man hinuon nga sagpa ang iyahang nadawat gikan sa maong babaye.

“Peste ka!!! Giatay ka!!! gadaghag lang na nawong nimo!!! bwessit!!” dili mabangbang nga pamalikas gikan sa babaye nga dili gyud maporma ang hitsura sa kalagot samtang namunit sa nakagay niyang mga kinompra.

“Hoy! Miss, gwapa pero maldita! Ayaw ko anaa sa pagpakaulaw atubangan sa daghang mga tawo ha!!! ikaw pa gani ang nanasmag kanako unya ako pa karon ang himuon nimong sad-an, ka wala guy uwaw nimo?” sumbalik nga mga pulong gikan ni Unyot ngadto sa dalaga.”

Unsay ako’y sad-an?! gwapo man unta ka apan hambugero!” tubag usab sa babaye nga grabe gyung pagkasukua ngadto ni Unyot.

“Wala man siguro ka mabuta nga dili ni nimo makita ang nabuhagay nakong mga kinompra?! dugang pa sa babaye ngadto ni Unyot.

Pagkasunod nga adlaw, niadto si Unyot sa usa ka iladong kan-anan dinhi sa Sugbo aron paghupay sa gibati niyang kagutom apan sa dihang mopili na unta siya’g menu nga iyahang orderon,wala niya matuyo nga ang iyahang usa ka tuhod napangka sa laing tuhod ngadto sa laing customer nga namili usab sa menu. Nagkatin-away sila sa usa’g-usa ug sa wala damha nga panghitabo, ang iyang gipangka sa tuhod mao usab ang babaye nga nabangga niya sa mall.

“Patay, disgrasya na sab!” matud pa ni Unyot sa iyahang kaugalingon.”

“Ang baga’g nawong, gisunod-sunoran jud ko!” matud pa sa babaye ngadto ni Unyot nga ingon sa masuk-anon gihapon kaniya.

“Miss, wala tika sunod-sunora, unsay pagtuo nimo nako, imong iro?” pulong pa ni Unyot.

“Insidente lang kaayo nga nagkatagbo na usab ang atong dalan karon aning dapita, kay gigutom ako ug niining ka-anan ako nisulod. Maayo pa hinuon nga tapuson nalang ta kining atong panagbangi ug mag-share nalang kita’g lamesa kay puno naman pod ang tanang lamesa gawas ani”, tanyag ni Unyot sa babaye.

“Unsa pa man ang akong mahimo nga wala man ko’y lain nga kapiliang lamesa, ug usa pa sab gigutom na kaayo ako,” tubag sa babaye.

Ug sa ilahang pagpangaon wala magpanagana si Unyot sa pagpangayo og dispensa sa babaye.

“Sorry ha, kong nakahasol ako kanimo, dili nako tuyo ang pagdisturbo nimo,” ni Unyot pa ngadto sa babaye.”

Nagkahigayon nga nagkasugat ang atong dalan sa ingon aning panghitabo.”

“Pasayloa- usab ako tungod wala ko kapugngi ang akong kaugalingon sa pagpakaulaw kanimo atubangan daghang mga tawo,” dispensa usab sa babaye ngadto kang Unyot.

“Naay maayo ay, kalimtan nalang nato kadtong mga ngil-ad nga nanglabaw. Ang mahinungdanon karon mao nga nagbinatiay na kita sa usa’g-usa,” matud pa ni Unyot.

“Lain pay ato, tawaga lang diay ako sa ngan nga Unyot, dili gwapo pero uso,” ni Unyot nga dang pasiaw.”

Tala-tala jud ni siya o!” matud pa sa babaye.

“Ako usab diay si Lyn-lyn,” dugang pa ni Lyn-lyn uban sa tam-is nga pahiyom.”

Mosamot man diay ka kagwapa no kong mo-smile,” ni Unyot pa.”

Saba diha oy, bolero jud ka!” tubag sa babaye.

“Mahimo bang managhigala na kita sugod karon?” hangyo ni Unyot ngadto sa babaye.”

Ug nganong dili, ako na hinuong nasuta ang imong kabuotan,” tubag sa babaye ngadto kang Unyot.

Sukad niadto nahimo na gyud silang duha nga suod nga managhigala ug wala gyud diay tig-ang kasing-kasing kung makakat-on lang kita sa pagpailob ug pasaylo. (Kataposan)