Gula 3
“Mora’g tan-aw nako Prec, nahasol ka g’yud kaayo nianang buot mo nga itug-an nako. Sige adto ta manglingkud sa sala kay aron madungog ra nato kun manawag si Ma’am. Bi unsa ba kanang imong problema Prec?” ni Lino pa.
“Nanguyab nako si sir Marco ug makadaghan na ko niya buot sudlon sa kuwarto apan wala siya magmalampuson. May duplicate siya nga yawe ug giablihan na unta niya ang kuwarto apan maayo gani kay dali nako nga nababagan sa katre,” saysay ni Precy.
Kalit lang nga nahinumdom si Lino niadtong higayon nga gibaoran siya ni sir Marco niya nga dili na makigsulti kang Precy ilabi na panahon sa gabii. Karon nahatagan na og tubag ang iyang kalibog kun nganong gidid-an siya sa iyang agawon.
“Mao diay nga dili siya gusto nga makigsulti ko nimo panahon sa gabii,” ni Lino pa ngadto sa dalaga. “Tinuod, nakit-an niya kita nga nagsultihanay kadtong bag-o ka pa nga miabot ug iya ko nga giingnan nga likayan ka,” matud ni Precy.
Miyango-yango si Lino. Karon natubag na usab kun nganong dunay mga higayon nga masabtan niya nga daw maglikay si Precy kaniya kun anaa pa sa balay si Marco.
“Magbantay ka kanunay Prec. Nahibawo ko nga nangita ra og hustong higayon si sir Marco aron nga iya ka nga mabiktima,” gipasidan-an ni Lino ang dalaga. “Tabangi ko pagbantay Lin ha?” paraygon ang tuno sa sinultihan ni Precy.
“Sure, dili ko makatugot nga mabiktima ka sa atong agawon nga lalaki. Katonto no, minyo na gud siya, ako na lang,” sagol komedya ang sulti ni Lino nga nagpahiyom ngadto sa dalaga.
Mitig-ik si Lino dihang gikusnit ni Precy ang iyang kilid. Mitingog ang buzzer nga nagpasabot nga nanawag ang masakitong asawa ni Marco nga atua naghigda sa kuwarto. “Adtuon usa nako si Ma’am,” nagdali si Precy nga mipaingon sa kuwarto.
Gisunod ni Lino sa pagsud-ong si Precy. Dili niya kalimdan ang iyang kaugalingon nga may pagtan-aw siya sa dalaga. Taud-taud migawas si Precy gikan sa kuwarto. “Nagpatabang ra diay si Ma’am nga makalingkod motan-aw siya’g TV show,” matud sa dalaga.
Nananghid si Precy kang Lino nga moadto na sa kusina kay magloto og pagkaon para sa ilang paniudto. “Sige, pero ayaw kalimot ha… pagmatngon kanunay apan ayaw kabalaka kay dia ko nga nagmahal kanimo,” gigunitan ni Lino ang bukton sa dalaga. Wala motingog si Precy ug igo lang mitutok sa ulitawo. (Sumpayan)