Gula 76
Kahilom.
“Tana,” miagda si Jeffrey kaniya pagkilab sa pipila ka daklit. “Mamalik na kita sa payag aron makapamahaw.”
Ug miuna paglakaw si Jeffrey. Misunod si Danica.
“Jeffrey...”
Gisangpit ang ulitawo ni Danica samtang nanglakaw sila.
“Ngano?” Mihunong si Jeffrey ug milingi kaniya.
“Salamat diay s-sa...”
“Sa unsa?”
“S-sa imong gakos nga maoy nakapahuwas sa akong takig.”
Daklit nga nagkatinutokay sila si Danica ug Jeffrey. Dili layo ang ilang distansiya sa usa’g-usa mao nga nagkabag-iray gayod og maayo ang ilang panan-aw. Nakita ni Danica nga ingon sa napihaw og diyotay ang nawong sa ulitawo sa iyang gisulti.
“D-dili ka angay magpasalamat,” nagkanayon si Jeffrey. “A-ako hinuon ang angay mangayo og pasaylo nimo tungod sa akong kamapangahason.”
“Kamapangahason?” Mikunot ang agtang ni Danica nga mitutok kang Jeffrey.
“Oo. Ang akong paggakos nimo maoy usa ka dakong pagpangahas. Apan dili nako tumong ang pag-take advantage nimo. Gibuhat ko kadto tungod kay wala na ko’y nahunahunaan nga laing paagi aron mahupay ang gibati mong katugnaw.” -- Sumpayan pa