Boy ug Maid

Lisud kaayo ang kinabuhi nila ni Lino nga nabuhi lang sa pagpanguma sa bukid. Kini maoy nakaagni kaniya nga mouban sa iyang higala nga si Eddie sa pagpangita’g trabaho dinhi sa dakbayan.

Sanglit igo ra man nga nakahuman si Lino og elementarya naglisud siya pagsulod og mga maayong trabaho. “Wala g’yud ko’y laing mahimo bay Ed, mosulod na lang ko pagka boy,” matud ni Lino nga nakakita sa karatola nga gibitay sa pultahan sa dakung balay.

Gipislit ni Lino ang boton nga gibutang duol sa pultahan ug nadungog nila nga dunay mitingog didto sa sulod. Taud-taud, may miabli sa pultahan. Usa ka batan-ong babaye ang misugat sa ilang panan-aw.

“Unsay ato?” matud sa babaye. “Moaplay unta ko pagka boy, nanginahanglan mo?” giingnan ni Lino ang babaye. “Kamo la’y pag-estorya si Sir Marco, dali sulod mong duha.”

Gidawat si Lino pagka boy. Angayan man usab siya nga motrabaho pagka boy kay bisan og 18 na ang iyang edad daw bayong-bayong pa siya nga tan-awon.

“Magtinabangay lang kamo si Precy dinhi sa balay Lino kay kita ra may nagpuyo dinhi, minyo na man ang duha ko ka mga anak,” giingnan ni Marco ang bayong-bayong.

Nahibaw-an ni Lino nga masakiton diay ang asawa ni Marco ug kanunay lang kini nga maospital.

“Sigi, molakaw na lang ko bay Lin kay nadawat ka na man og trabaho. Duaw-duawon ko lang unya ka dinhi,” matud sa higala niini nga si Eddie.

Nagsugod dayon sa iyang trabaho si Lino. Sanglit taga probinsya siya, dili na bag-o alang kaniya ang maong mga gimbuhaton nga gisangon kaniya ni Marco. Gilimpyohan niya ang palibot sa balay.

“Taga diin ka man diay Lin?, “gisukit-sukit si Lino ni Precy nga katabang ra usab sa balay. Nagsuginlanay sila sa ilang kaagi ug maoy nakapahimo kanilang duha nga suod.

Pag-uli ni Marco gikan sa trabaho, nalipay kini kaayo kay nakakita siya og kausaban sa palibot. Nahapsay ang palibot sa balay nga gilimpyohan ni Lino ug gipundok ang mga butang sa luyo.

Pagka gabii na. “Adto ka diay pakatulga ni Sir Marco sa kwarto duol sa grahe, ako na kadtong gilimpyohan kaganina,” giingnan ni Precy si Lino. “Salamat Precy ha?”

Nabag-ohan si Lino, wala dayon siya makatulog. Nakahuna-huna siya nga mogawas ug didto milingkud sa semento nga lingkoranan atubangan sa balay. Nakadungog siya’g kasikas sa iyang luyo. (Sumpayan)