Ang traje de boda ni Margarita mangtas

Nagkasabot ra gyod sila si Margarita ug ang iyang hinigugma nga si Hipolito nga magpakasal ug kini gitakda sa sunod bulan. Dugay na man god kining ilang relasyon ug kay nakatrabaho na man si Hipolito isip supervisor sa usa ka kompaniya maong mipadayag na lang gyod ang ulitawo nga bug-oson na lang gyod nila ang duha nila ka kasingkasing diha sa balaanong sakramento sa kasal.

Tuod, ila dayong gipangimbitar ang ilang mga paryente. Ang mga paryente ni Hipolito tua sa Bohol sanglit mga Bol-anon man og kaliwat ang iyang mga ginikanan.

Samtang si Margarita ang iyang kaliwat naa ra sa isla Pakolupad nga nadungog nga dunay daghang mga ungo. Sa sinugdan wala motuo si Hipolito nga kaliwat og ungo ang iyang pangasaw-unon apan dihang gidala ni Margarita ang iyang pamanhunon didto sa ilang isla, nanglugdat ang mga mata niini sa kakuyaw kay mao may nadiskubrihan ni Hipolito nga dunay binuhing mga sigbin ang mga ginikanan sa dalaga.

“Dugay na kanang mga sigbina, Pol,” ni Margarita pa ngadto sa ulitawo. “Gamay pa ko naa na kana sila...”

“Kun...kun mao na ... kuan diay ... kuan diay mo, Mar,” mora’g dili hapit makasulti si Hipolito sa buot niyang ipasabot.

“Oo, mga kaliwat mig ungo,” hinay ug kalmado ang tingog ni Margarita. “Unya, karon nga nahibawo ka na, Pol, mopadayon ka pa ba nga magpakasal ka nako?” Mitutok si Hipolito kang Margarita.

“Mahal ko ikaw, Mar, busa kun unsa ka man, wa koy labot niini. Ang importante nga nagminahalay ug magminahalay tang duha...”

Mitulo ang mga luha ni Margarita sa pagkabati niya sa gipulong ni Hipolito. Karon, natugkad na gyod niya nga gihigugma gyod diay siya niini bisan pa luyo sa tanan niining kasayoran bahin sa iyang pagka kaliwat og ungo.

Unya usa ka hapon niana samtang nanuroy silang duha si Margarita ug Hipolito sa mamingaw’ng baybayon, dunay grupo sa mga bagis nga mga batan-on nga nakahigop na’g shabu nga ning duol kanila ug gitabangag bukbok si Hipolito ug hangtod kini namatay.

Ug si Margarita ila pud nga gitabangan og lugos. Ug kay unom sila ka buok nakuyapan si Margarita ug pagkamatngon niya’g buot didto na siya sa ospital. Ug didto miminatay pag-ayo si Margarita dihang nasayran niya nga patay na si Hipolito.

Didto sa lawak ni Margarita wala tuyoang nakita niya ang takdol nga buwan sa bukas nga bentana. Ug dinhi iyang gisul-ob ang traje de boda nga alang unta sa ilang umaabot nga kasal ni Hipolito. Ug atubangan sa salamin gihunosan niya ang iyang kaugalingon apan wala siya hikabsi sa iyang kinabuhi.

Apan may mabati kanunay sa mga silingan nga hilak nga gikan sa balay nilang Margarita. Unya, mobanos ang tingog sa wakwak. Langgis kaayo ang tingog sa wakwak nga morag dunay kasuko.

Unya, nagubot ang grupo ni Pagong dihang duna kunoy usa ka mangtas nga babaye nga nagsul-ob og traje de boda ug gipamugno ang iyang mga kauban. Nahurot ang mga hinanib ni Pagong samtang si Pagong nakalugar pa gyod sa pagdagan. Apan hiapsan siya sa mangtas nga babaye nga nagsul-ob og traje de boda ug gikuptan ug namulong kini: “Ikaw, ang nagpatay sa akong pamanhunon nga si Hipolito ug inyo pa gyod kong gitabangan og lugos, mga hayop kamoooooo!!!! Yeeeeehhhhh! Wakkkkkk!!! Wakkkkkk!!!”

Buot modagan si Pagong apan gipaak siya sa mangtas nga babaye. Pagkaugma tunog kaayo ang balita bahin sa kamatayon sa gikahadlokang “Gang” sa mga bagis nga pinangulohan ni Pagong Pikat.

Ug dunay nakakita nga ang mipatay kanila usa ka babaye nga nanglikaang kuno ang tag-as nga buhok ug nagsul-ob og bisti sa kasal. Ug matag gabii madungog kanunay ang tiyabaw-danguyngoy ni Margarita Mangtas. (Kataposan)