Balik sa gibiyaan nga kalibotan

Gula 27

“Nagkalingaw na lang sa dagat,” maoy tubag. “Giundangan ko na man pagtikad ang yuta nga kabilin ko sa namatay kong mga ginikanan. Hasol kaayo. Ang mga rebelde maoy unang motilaw sa akong abot.”

Nakapanglingo siya sa kasayoran nga gibutyag ni Pasyo. Wala tuyoa, nakapanaguto siya. Siya ray nasayod kun ngano.

“Ang katunga sa kabilin kong yuta akong gibaligya,” mipadayon si Pasyo. “Akong gipuhonan sa panagat. Mipalit ko’g pumpboat ug pukot.”

“Maayo man sab kaha ang agi sa dagat?” nangusisa siya.

“Bentaha man sab,” maoy tubag. “Mao na lang gud ni gisaligan namo sa panginabuhi.”

Miyangoyango siya. Unya miliraw ang iyang mga mata.

“Ikaw, Pre,” gikan ni Pasyo. “Unsa man say imong gikalingawan karon?”

“Nangita pa ko’g trabaho,” laktod niyang tubag.

“Daghan na ko’g giaplayan sa lungsod pero wala’y midawat nako. Tingali, tungod niini.”

Gitudlo ni Gener ang iyang patik. Nahasagnunot pagtan-aw si Pasyo sa patik nga dragon sa iyang bukton. Gitutokan kini pag-ayo sa iyang kompare.

“Kun gusto ka, Pre,” ni Pasyo pagkilab sa pipila ka daklit. “Kuyog lang una nako’g panagat. Nagkinahanglan man ko’g kaabag ron. Miyentras tanto lang gud nga wala ka pay permanenteng trabaho. Ako nay maantigong mobugti sa imong kahago. Kun suwertehon, mag-angay ta sa grasya.”

Nahitutok siya kang Pasyo. Gipangita niya ang kamatinud-anon sa kidlap sa mga mata niini. Buot niyang sutaon kun dili ba usa lamang ka tiaw ang gitanyag niini kaniya.

Natugkad niya ang kamatinud-anon ni Pasyo. Nasuta niya nga naggikan sa kasingkasing ang pag-agni niini kaniyang mokuyog sa pagpanagat. Tingali nakasabot ang iyang kompare sa iyang kahimtang. Basin nakita niini ang iyang panginahanglan. Mosanong na unta siya sa pagdawat sa tanyag. Trabaho guy iyang tuyo. Mao kini ang hinungdan nga nakigkita siya kang Pasyo. Pero dihay kalit mibabag sa iyang hunahuna si Deling, ang iyang kumare. -- Sumpayan pa