Balik sa gibiyaan nga kalibotan - Gula 26

“Ang Dios dili ingon sa uban, Pre,” nagkanayon si Pasyo. “Nakita niya ang imong gibuhat. Nga nanalipod ka lang sa imong katungod batok sa malupigon nga miilog sa inyong yuta ug buot pang manamastamas sa imong pamilya.”

Wala makatingog si Gener. Mipusnga ang iyang hunahuna.

“Dako baya’g nahimong kausaban sa Lumangog ang pagkapatay mo kang Don Gabaldon,” gikan ni Pasyo. “Tungod sa maong hitabo, mora’g nagkinto na ang iyang mga kaliwat. Mora’g nakaamgo sila nga kuyaw diay ang mga kabos kun mao nay masuko.”

Wala gihapon siya motingog. Angay unta niyang ikalipay ang gisulti ni Pasyo. Pero giluok siya sa kahisagmuyo. Sakit kaayo ang bugti sa iyang nabuhat. Nahilayo siya sa pagbati sa katawhan sa ilang dapit. Gihukasan siya sa katungod sa pagpakigsandurot kanila.

“Maayo kay nakahunahuna ka’g duaw nako, Pre,” gidagpi ni Pasyo ang iyang kahilom.

“M-mahitabo ba gud nga dili,” niya pa nga naalimatmatan. Kompare gud ta. Didto ko sa kanhi ninyong gipuy-an sa Sitio Linaw. Pero nalibon na ang gilun-an sa inyong balay kaniadto. May nakasulti nako nga mibalhin mo dinhi.”

“Napugos ko’g lalin, Pre,” pasabot ni Pasyo. “Unsaon, gilubatlubatan na man si kumare mo Deling. Dili na gayod kuno siya mopuyo bisan pa’g suholan sukad nga nagkabangga didtong dapita ang puwersa sa mga sundalo ug mga rebelde. Bahala na kuno’g asa mi paingon basta mahilayo lang niadtong lugara.”

“Labihan na gyud diay’ng pagsiaw sa mga rebelde karon,” niya pa.

“Mo lang,” ni Pasyo. “Hasol pa kaayo. Magpunay og pangayog hinabang sa mga tawo. Kuno, revolutionary tax. Ang nakaparat kay kun matiktikan ka sa mga sundalo nga mihatag og suporta sa mga walhon, dudahan ka sab dayon nga alsa masa. Nakadugang sa kasamok dinhi kanang mga sundalong abusado.”

“Mao sab bitaw kanay gisulti ni Lucia,” niya pa dayong tungab sa baso nga namuaypuay sa bag-ong dawat nga tuba.

Mitungab sab si Pasyo sa iyang baso nga napuno sa buntagon.

“Unsa may imong kalaki karon, Pre?” gikan ni Gener human iyarok ang usa ka basong tuba. -- Sumpayan pa