Tig-comfort, nanguyab

Dear Tita Salie,

Have a good day. I really love to read your column. Just call me Geng, single and I have boyfriend, taga Moalboal ko, Tita.

Sa una dihang 17 years old pa lang ako duna koy boyfriend. Love kaayo nako siya, Tita, apan nagkabulag ming duha tungod kay nilarga ko paingon sa Manila kay toa man didto ang akong ate nagtrabaho. Gusto lang ko makatabang sa akong pamilya busa nanarbaho usab ako.

Tungod sa akong paglarga, naputol usab ang among communication. Naguol gyod ko sa nahitabo kanamo apan wala nakoy nahimo. Dugaydugay usab ang akong pagpanarbho didto sa Manila, ug hangtud nga nipauli ko sa amoang balay sa Moalboal.

Sa dihang naa na ko sa amo nagtambay, nagkita mi sa akong amigo nga maoy tig-comfort kanako sa panahon nga mag-away mi sa akong uyab sa una. Tungod lagi kay taudtaod ko nga nawala sa amoa taudtaod gyod ang among estorya apan wa nako mangutana bahin sa akong bf. Apan nakurat ko kay nanguyab man hinuon siya nako, Tita. Ug tungod lagi kay suod na kaayo mi og buotan siya ako siyang gisugot.

Dihang uyab na mi, nagpakita usab pagbalik ang akong kanhi uyab. Love pa gyod nako ang akong ex. Tita. Apan dili usab ko gusto nga masakitan ang akong uyab karon kay buotan gyod kaayo siya nako ug mahal ko na usab siya. Naglibog gyod ko, Tita. Palihog pasabta ko. Thank you. -- Geng

* * *

Hello, Geng. Mas maayo unta kadto kun nananghid ka og tarong sa imong boyfriend. Imo unta siyang gibilinan sa contact number sa imong ate o kaha address aron didto lang una mokontak ang imong boyfriend samtang wala ka pay permanenting kapuy-an. Wala gyod ka makapangumusta mahitungod sa imong boyfriend dihang nagkita mo sa imong higala nga karon nahimo na nimong hinigugma? Kay ang matuod nga nagmahal makisusi gyod kini kun naunsa na ang tawo nga iyang gihigugma sa unang panahon, kay imo mang gikakita ang tawo nga maoy tig-comfort kanimo kun mag-away kamo sa maong tawo.

Truth is sometimes hurting. But, pilit nato kining dawaton kay mao man gyod kini ang kamatuoran. Dili na puyde nga imo pa kining ilisan, kay mao man kini ang kanunay natong gipangita, ang kamatuoran. Busa, imong timbangtimbangon kun kinsa kanila ang mas imong gihigugma. Kay dili maayo kun dunganon nimo silang duha sa paghigugma. Imo silang pakigsultian, ug pasabton nga ilang dawaton kun unsa man ugaling ang mamahimo mong hukom.

Kun maluoy ka sa imong amigo, kaloy-i lamang siya, apan lahi ang paghigugma. -- Tita Salie