Sugar Daddy

Gula 3

Nagbuntag na lang nga walay maayong kinatulgan si Sylvia. Pagka-ugma, Domingo, daw gikulbaan si Sylvia kay udto ang ilang sabot nga magkita og si Fermin.

Gitawgan niya ang higala niya nga news reporter ug gitug-anan sa iyang plano nga makigkita ni Fermin. Nakasabot ang reporter sa kalisod sa kahimtang ni Sylvia. Kun mobalibad siya, sigurado nga maputol ang paghatag ni Fermin og sustento kaniya.

Usa kini sa rason nga si Sylvia nakapadayon sa iyang pagtuon sa kolehiyo ug anaa na sa third year sa kurso nga Commerce, major in Accounting. “Basa ra gud anang balita nga anaa sa newspaper,” giingnan ni Sylvia ang higala niya nga reporter.

Nahadlok si Sylvia nga mahisama sa nahitabo sa usa ka kawani sa City Hall nga human nagkalalis ug sa Greek niya nga uyab sa on-line, gipublikar sa Facebook ang hubo niya nga hulagway.

Bisan tuod og wala tug-ani ni Sylvia si Fermin sa iyang password sa Facebook apan mahimo man nga adto niini i-upload ang hulagway niya naghukas usab sa sapot sa account ni Fermin.

“Sige suginli unya ko og unsay mahitabo ninyo,” matud sa reporter nga higala ni Sylvia sa dayon nilang human og sultihanay sa cellphone niadtong Domingo sa buntag.

Wala pay alas 12 sa udto, migikan na si Sylvia sa iyang gipuy-an. Miadto na siya sa SM nga maoy gikasabotan nila ni Fermin nga magkita. Basi sa ilang gikasabotan, magsul-ob si Fermin og pula nga jacket ug magpaabot kaniya sa coffee shop.

Hinuon, nakatimaan si Sylvia sa panagway ni Fermin nga nakita lang niya atubangan sa camera. Gipaliraw ni Sylvia ang iyang mga mata sa mga tawo nga didto sa coffee shop, apan walay nagsul-ob og pula nga jacket.

Milingkod siya sa bakanteng lamesa ug mi-order og juice. Unya, takulahaw lang nga may migunit sa iyang abaga. “Ganina ka pa ba?”

Wala makatingog si Sylvia kay ang maong tawo wala man magsul-ob og jacket nga red ug lahi usab kini og dagway sa tawo nga iyang gika-cybersex. Milingkod ang tawo atubangan ni Sylvia.

“Nasayod ko nga nahibulong ka. Ako si Fermin apan ipasabot nako nimo kun nganong lahi ang akong panagway kun tua na kita sa bugnaw nga lugar,” matud sa lalaki. “Tana, adto ta sa parking area, sa giparkingan sa akong kotse,” ni Fermin pa. (Sumpayan)