Duha ka sugilanon ang guwatsinanggo

Si Narsing maoy giila nga labing guwatsinanggo sa balangay. Traysikad drayber lang ang iyang trabaho ug kay maoy iyang panginabuhi sagad makita sa dalan nga magsikad padagan sa iyang sakyanan. Ug sa iyang guwatsi, kasagaran sa iyang pasahero mahimuot sa kalipay.

Didto sa may eskina, nakita ni Narsing nga nagpaabot sakyanan si Teddy padulong sa iyang opisina usa ka buntag niana. Polis sa lungsod si Teddy nga nadestino sa trapiko. Mao nga iyang gihunongan si Teddy ug gipasakay sa iyang traysikad.

Samtang nagpadagan sa iyang traysikad si Narsing, may natimahoan si Teddy. Nangusmo ug nanampong sa iyang ilong si Teddy.

“Nangutot ka, Narsing...?” Nangutana si Teddy.

“Wa uy...! Nanug-ab lang.” Dali nga tubag ni Narsing.

“Ahhh, bahoa gud tawon! Unsa may imong pamahaw, tinabal?” Sukna singka ni Teddy dungan ang pangulihad. Wa lang motubay si Narsing sa sukna singka ni Teddy. Mora’g hapit makatag-an si Teddy sa iyang pamahaw nga bisan sa panug-ab lang nangalisbo sab ang alisngaw sa “makabungog nga alimyon.” Ginamos mawos ang sud-an sa iyang pamahaw...!

Pag-abot sa iyang destino, nanaug sa traysikad si Teddy ug gitunol ngadto kang Narsing ang pamiliti. Dali nga mipabalik si Narsing sa iyang traysikad nga medyo maulawon uban ang panganti alang sa sunod buntag.

Pagkasunod buntag, nakita na sad ni Narsing nga nagpaabot sakyanan si Teddy sa may eskina. Dali nga mipadagan si Narsing sa iyang traysikad ug gihunongan dayon si Teddy. Misakay sab si Teddy ug dayon nangutana: “Unsay pamahaw mo ganina...!”

“Ambi tag-ana ang akong pamahaw...!” Matud pa ni Narsing dungan ang pahiyom. Sa pahiyom ni Narsing, nakita ni Teddy nga mipilit sa ngipon ni Narsing ang kamunggay.

“May lain pa... utan kamunggay!” Kantalita ni Teddy kang Narsing. Nakalitan si Narsing sa kantalita ni Teddy. Apan dali sab nga mitubag si Narsing ngadto kang Teddy.

“Unya, ang subak sa utan... manok man sad!” mora’g nasud-ipan si Teddy sa tubag ni Narsing.

“Wa ko’y dag-anan nimo dah...! Aron way lalis, hilom na lang diha!!!” Pahimangno ni Teddy ngadto kang Narsing dungan ang pagtakin sa pistola sa iyang hawak. Nahilom tuod si Narsing nga sa hilom nagkanayon: “Masuko man diay kun di katag-an...!”

Sa pagkanaug ni Teddy sa traysikad duol sa opisina, kusog pa sa alas kuwatro nga mipabalik sa iyang traysikad si Narsing sa kahadlok nga mapusilan siya ni Teddy. (Kataposan)