Maunongon Ang Gugma - Gula 67

Nakaabot gayod si Jeffrey sa ibabaw nga bahin sa pangpang nga wala’y kakulian. Sa paghimuntog niya sa ibabaw sa pangpang, iyang gilingi si Danica didto sa ubos. Nakita niya kining naglingkod na sa nag-igdal nga gamot sa kahoy.

Mapahiyomon si Danica nga mikaway kaniya. Mibalos usab siya pagkaway ngadto sa dalaga.

Unya misugod na siya sa pagpaniid sa palibot sa lasang. Nagpaningod siya sa mga kinasikas sa lasang nga posibleng mugna sa mga tiil sa manok ihalas nga nangakha aron sa pagpangita’g makaon.

Taudtaod nang naglingkod si Danica sa nag-igdal nga gamot sa kahoy. Unya nakadungog siya’g usa ka buto sa armas. Misantop sa iyang hunahuna nga nakakita na tingali si Jeffrey og manok ihalas ug gipusil kini sa ulitawo.

Nakurat si Danica dihang may mitadlas nga kahayag sa ibabaw sa kakahoyan nga gisundan sa makalilisang nga liti. Nakahangad siya sa langit lagbas sa naglambungay nga mga dahon sa kahoy.

Mora’g ka-uwanon! Nalukop sa itom nga dag-om ang langit. Unya mihuros ang bugnaw’ng hangin nga ingon sa miukay sa mga dahon sa kahoy sa lasang.

Nakita ni Danica si Jeffrey nga nagdali pagkanaog sa sigpit nga agianan gikan sa ibabaw sa pagpang paingon sa iyang nahimutangan. Nagbitbit na kini og manok nga wala nay kinabuhi. -- Sumpayan pa