Gula 65
Gipili kini niyang lugara tungod kay gusto siyang mag-inusara. Gibiyaan lang niya si Danica nga nagdigamo didto sa payag alang sa ilang paniudto.
Gipamalandongan niya ang gisulti ni Danica kaniya kaganina. Ingon sa may bahin sa iyang galamhan nga naabli sa iyang pagkadungog sa mga pulong sa dalaga. Nabatyagan niya nga sa matag higayon nga seryosong butang ang panagsultihan nila ni Danica, ingon sa mogaan ang iyang balatian.
Nakahatag kaniya’g dakong hagit ang gisulti ni Danica nga siya maoy gikuhaan og kusog niini sa pagpakigbisog. Wala niya kalikayi nga mobati’g kauwaw sa iyang kaugalingon gumikan sa gipakita niyang kahuyang ngadto ni Danica. Nahimuot siya sa hilom samtang naghunahuna nga siya nga usa ka lalaki gimaymayan na hinuon sa usa ka babaye.
Wala niya ilimod sa iyang kaugalingon nga daghan siya’g nakuhang pagtulon-an gikan sa kasinatian sa kinabuhi ug gugma ni Danica hangtod na sa drama niini isip usa ka runaway bride. Gaan kaayo ang iyang buot ngadto sa dalaga.
Pagkapalis, nakahunahuna si Jeffrey nga mangayam og manok ihalas. Ang iyang .45 kalibreng pistola maoy iyang gamiton sa pagpangayam. -- Sumpayan pa