CEBU, Philippines - Nahibawo ba kamo nga naay daghang lumolupyo sa kasikbit natong mga lalawigan ang manganhi sa Sugbo matag weekend (Sabado ug Domingo) aron lang mokaon? Ang uban niini entero pamilya.
Kini atong nahibaw-an gikan sa duha ka manager sa duha ka kan-anan dinhi sa dakbayan.
Si Ma’am Leilani (gipugngan ang apelyido gumikan sa iyang hangyo), supervising head sa usa ka medyo-luho nga kan-anan sa Lahug, misulti niining tagsulat nga matag weekend daghan silang customer nga gikan sa gawas sa Sugbo.
Kasagaran kuno sa out-of-towners gikan sa Bohol (Tagbilaran City) ug Negros Oriental (Dumaguete City).
Samtang si sir Jimmy (dili niya tinuod nga ngalan), head waiter sa usa ka kan-anan sa shopping mall, nagkanayon nga kada Sabado sa gabii duna sila’y customers nga entero pamilya gikan sa Tagbilaran.
Suma pa sa atong tinubdan kining mga out-of-towner mianhi sa Sugbo dili nga mo-shopping ang tuyo kun dili “mo-enjoy sa pagkaon diha sa atong mga restaurant.”
Busa mahimong atong ingnon nga ang atong mga kan-anan usa sa atong mga tourist attraction ug revenue sources.(/JVJ)