Balik sa gibiyaan nga kalibotan - Gula 19

“Naa ka bay biodata o kaha police clearance?” sa Insek pa.

Kalit misugod ang bugnaw’ng singot ni Gener, daw nakig-indig sa kakamig sa binuga sa aircon. Mora siya’g napaso sa pangutana ni Mr. See. Wala siya’y dala bisan usa sa gipangita niini. Ang bugtong niyang bawon sa pagpangaplay mao ra ang mainitong tinguha nga makabaton og trabaho. Wala siya magdahom nga hangtod ang maong matang sa trabaho nagkinahanglan pag daghang rekisitos. Gawas pa, siguradong mountol siya sa panginahanglan sa police clearance diin matuki nga usa siya ka ex-convict.

“Wala ra ba ko’y dala, S-Sir?” mikurog ang iyang tingog nga giyunyunan sa kahisagmuyo.

“Uy,” nakaingon ang Insek. “Unsa man kang klaseha sa pagka-aplikante?

“Wala siya makatingog. Miilog ang bakikaw nga kahilom. Mora siya’g nahilis sa iyang gilingkoran.

Mitindog si Mr. See. Miduol sa steel cabinet ug may gikuhang folder nga nag-amping sa daghang mga papeles. Gidala kini sa Insek ngadto sa talad. Apan sa wala pa kini mobalik paglingkod, nasangpit ang tinan-awan niini kaniya.

“Unsa man nang naa sa imong bukton?” sa Insek nga nakaalinggat sa iyang patik.

Mikuba ang iyang dughan. Milipaghong ang iyang nawong. Wala siya masayod kun unsaon niya pagpasabot ang Insek mahitungod sa iyang patik.

“Sakop ka sa usa ka gang?” nangutana na usab si Mr. See.

“D-dili, Sir,” nagkapuliki ang iyang hunahuna kun unsay itubag sa pangutana. “K-kuan...ki-kining...gikan ko sa bilanggoan...”

“Nakapatay ka?” gitutokan siya sa Insek.

Yango ray iyang gitubag. Miduko siya sa atubangan ni Mr. See. Gitukbil siya sa kaulaw. Nawad-an og kaisog ang iyang mga mata pagharong sa tinan-awan sa Insek. Ingon sa migamay ang iyang kaugalingon. -- (Sumpayan pa)