Gi-hold ang passport

Dear Tita Salie,

Maayong adlaw. Tawga lang ko og Jam. Ang akong problema, Tita, mahitungod kini sa akong passport nga gi-hold sa akong agency.

Gi-hold sa agency sa akong gi-aplayan sa una kay wala man ko modayon paglarga tungod sa usa ka kakulian nga dili puyde likayan. Dili kuno nila i-release ang akong passport kondili ko mobayad og 5,000 kay kuno nakagasto na sila sa accommodation ug kaon didto sa Manila. Kay ang uban amo na mang gasto. Padong unta sa Kuwait ang akong biyahe kun nadayon pa ko paglarga. Usa pud sa ilang rason nganong ilang gi-hold ang akong passport kay nakagasto na sila sa akong employer didto sa Kuwait.

Puyde ba diay nga i-hold ang passport kun ugaling dili ta kadayon og larga, Tita? Puyde ba diay maka-hold og passport ang agency aron mapugos pagbayad ang mga tawo ngadto kanila?

Gusto na unta ko mangaplay pagbalik og trabaho kay kinahanglan gyod nako nga makatrabaho kay naglisod gyod ang akong pamilya karon. Apan maglisod ko kay wala na koy passport.

Palihog pasabta ko, Tita, sa angayan nakong buhaton. Daghang salamat and more power. -- Jam

* * *

Dear Jam. Ayaw padala nianang ilang binuang, wala man gani ka kalarga, sa wala gyod kay kwarta, unya karon gusto na hinuon nila nga pangwartahon ka. Daghan gyod kaayo nga mga agencies nga mao lamang ang gitan-aw ang makakwarta sila, ug secondary na lang ang makatabang sila. Ayaw paghatag sa maong kantidad nga ilang gipangayo. Mas maayo siguro nimong buhaton nga magpatabang ka. Mangita ka og tawo nga makatabang kanimo nga adunay kahibalo kabahin niini ug puyde nga makapadala og letter o notice ngadto sa maong agency.

Kun aduna kay kaila nga abogado, hangyoa siya nga tabangan ka sa imong problema. Mangutana ka lang sa mga saktong buhaton aron imong makuha pagbalik ang imong passport nga dili makabayad sa maong kantidad.

Tingali kun gibuhat kini sa imong agency kay nagtuo sila nga sa imong panginahanglan sa maong butang mobayad ka dayon ngadto kanila sa maong kantidad. Bisan pa man kun wala kamoy kasabotan mahitungod sa imong bayranan sa imong pag-apply.

Mas maayo siguro kun sa abogado ka mohangyo nga magpatabang, kun puyde ang abogado mosulat ngadto sa agency aron ilang paminawon. Kay kun ikaw lang ang moadto posible nga dili ka nila asikasohon ug ila ka gyod nga pabayron. -- Tita Salie