Maunongon Ang Gugma - Gula 63

Pag-uli ni Danica sa payag gikang naligo sa tubod, naabtan niya si Jeffrey nga naglingkod sa ikaduhang ang-ang sa hagdanan sa payag. May gigunitan kini nga gipunayan og tutok niini.

Nakabantay si Danica nga milamugdong sa kasubo ang nawong ni Jeffrey samtang nagtutok sa butang nga gigunitan niini. Giduol kini sa dalaga. Iyang nasuta nga ang hulagway diay ni Gemma Roca ang gisigehan og tan-aw niini.

“Nahinumdom ka na sab niya?” Sukit ni Danica.

Wala motingog si Jeffrey. Nanghupaw hinuon kini.

“Ambi kini.” Gikuha ni Danica ang hulagway gikan sa kamot ni Jeffrey.

“I-uli kana kanako,” matud ni Jeffrey.

“Dili,” ni Danica pa. “Dili ko kini iuli kanimo. Samtang anaa kanimo kining maong hulagway, dili ka gayod mahikalimot kaniya. Magpabilin kang maulipon sa imong kagahapon.”

Wala makatingog si Jeffrey. Wala usab kini mamugos sa pagbawi sa hulagway ni Gemma Roca gikan kaniya.

“Ingon niini ang akong gibuhat human sa kamatayon ni Efren,” nagkanayon si Danica. “Sakit usab kaayo alang kanako ang nahitabo kaniya tungod kay nagminahalay kami sa usa’g-usa. Mao nga gilabay nako ang tanang mga butang nga makapahinumdom nako kaniya. Ang iyang mga hulagway akong giuli ngadto sa iyang mga ginikanan. Gilikayan ko na usab ang pag-adto sa mga dapit nga maoy kanunay namong suroyan kaniadto aron dili na gayod ako mahinumdom kaniya.” -- Sumpayan pa