Giuli ni Pilo ang sobra nga sukli

“Papalita ko og bugas mais balig lima ka kilo, sardinas gagmay duha ka lata ug mantika nga usa ka lapad. Dawata usa ning bayad nako nang Tasya. Kinyentos na, Ninoy Aquino na,” dayong tunol ni Pilo ngadto ni Nang Tasya usa ka gabii niana sa iyang bayad.

“Nagabhian ka man lagi Pilo sa pagpalit og mga pagkaon sa akong tindahan?” sulti nga dala og pangutana ang tuno sa sinultihan sa edad - edaran nang tag- iya sa tindahan.

“Ada, karong orasa na gyod sa kagabhion nga nagrasyahan ko sa pagpamasada. Kaganiha mingaw kaayo ang mga pasahero. Maayo na lang gani kay dunay tulo ka mga pasahero nga kuwartahan ang mga hitsura ug mipakyaw nako padulong sa lungsod. Gipasobrahan nila ang ilang gibayad kanako,” temang pa ni Pilo.

“Huwat lang sa makadiyot Pilo kay taksan ka pag bugas ni Biring ug dawata unya ning sukli mo,” sulti pa ni Nang Tasya.

Gidawat ni Pilo ang sukli ug dayong sulod niini sa iyang bulsa sa karsones. Pagkahuman gidala niya ang iyang mga pinalit ngadto sa iyang traysikol nga giparking duol sa tindahan ug mipauli siya.

“Sabel, dawata ning mga pinalit ko og pagdigamo unya alang sa atong panihapon,” tawag pa ni Pilo ngadto sa iyang asawa nga nagkugos sa kamanghoran nilang anak nga si Junior sa paghiabot niya sa ilang kaugalingon.

“Misulod si Pilo sa ilang kuwarto aron sa pag - ilis og sapot. Ug dinhi giihap niya kun husto ba ang sukli nga gihatag kaniya ni Nang Tasya.

Nahasiga ang iyang mga mata kay dako mag sobra ang sukli nga iyang nadawat. May duha man ka tag dosentos pesos ug nahibalik man sa iyaha ang iyang kuwartang Ninoy Aquino. Ug may mga sinsilyo pa nga tag dyes ug tag singko pesos.

“Dako mag sobra ang sukling nahatag kanako ni Nang Tasya. Nanuybe sintos kapin na man hinoon kining tanan.”

“Sigurado gyod kong nalipat ug nasayop ang tiguwang niini,” sulti pa ni Pilo sa hilom ngadto sa iyang kaugalingon.

“Bag-ohay pa ra ba kong nasuklian og sobra didto sa lungsod apan wala nako iuli. Nagabaan ra ba ko kay nawagtangan hinoon ko og otso-sintos pesos. Ug nalimot lang gyod ko kun asang dapita ko kadto nga ikabutang,” dugang pa ni Pilo nga nagpanlingo-lingo.

“Kinahanglan iuli ko ning sobrang sukli kay magabaan na sab ko ning kalakiha. Anaa ra ba na sa panultihon nga ang gaba dili magsaba,” hunahunang mabasolon nga mipatigbabaw sa galamhan ni Pilo.

“Asa man ka Pilo nga nagkabayo na man sab ka sa imong motor?” pangutana ni Sabel sa iyang bana.

“May importanting tuyo ko kang Nang Tasya,” tubag pa ni Pilo ngadto sa iyang asawa ug dayong pasirit sa iyang motor nga gikuhaan niya sa iyang sidecar.

“Maayo gyod bitaw nga iuli nato ang sobrang sukli nga atong madawat sa umaabot nga panahon pinasubay sa panultihon nga ‘ solutio indebiti ’ kon lets never enrich at the expence of others. (Katapusan)