Kab-oton ni Lucy ang langit

Osting, may computer na lagi sila si Meling nga atong silingan, nagpa-deliver sila adtong usang adlaw, mapahiyomon nga miduol si Lucy ngadto sa iyang bana nga namarbas sa bungot usa ka adlaw’ng Domingo niana. Ada, pasagdahi na sila kay dako mag suweldo ang iyang bana nga si Rufo ug ang duha sab nila ka anak abroad man ug magpadalhan og dolyar kanila matag karon ug unya, tubag ni Osting ngadto sa asawa.

Inggitera ug ambisyosa si Lucy. Dili siya gusto nga malabwan sa iyang isigkaingon. Mabdos siya sa unang anak nila ni Osting. Nag-abang sila’g balay sa dapit nga ilang gipuy-an. Si Osting nagtrabaho sa gobyerno isip usa ka clerk sulod na sa bayente anyos ug hapit na moretiro sa trabaho.

“Sayon ra na loan lang sa GSIS. Kada bulan ra bitaw ang deduction niana,” sulti pa ni Lucy.

Daug kon ander-de-saya si Osting. Pilay estorya, mipalit si Lucy og computer gumikan sa salary loan ni Osting sa GSIS.

“Morag kulang pa man sa kahimanan ning among panimalay da,” nakasulti si Lucy sa hilom ngadto sa iyang kaugalingon usa ka udto niana.

“Maypag magpa-deliver ko og refrigerator para dili na mi magsige’g palit og ice sa among silingan ug permi pa ming makainom og bugnaw’ng softdrink matag karon ug unya,” naghunahuna sa hilom si Lucy.

Tuod man, gideliberan sila og usa ka refrigerator nga five cubic feet. Wala na lang magtingog si Osting aron kalikayan ang gubot ug lalis tali kanilang duha.

Para sayon ug kadiyot ra siyang nakaluto nagpalit si Lucy og rice cooker aron kuryente nalang ang mopadagan sa ilang mga linuto. Takulahaw lamang miabot ang takna sa iyang pagpanganak.

Naglisud siya busa gipaagi sa ceasarian operation aron mahimugsoan siya. Daku sila’g gasto mahitungod niini. Namorsiyento og kuwarta si Osting alang sa kasulbaran sa suliran.

Naputos sila sa utang. Hangtud giembargo sa kompaniya ang ilang refrigerator. Gibaligya ang ilang computer sa kubos nga bili ngadto sa ilang silingan nga si Tomasa.

Samtang nagpatotoy si Lucy sa iyang masuso nagkanayon siya. “Maayo gyud diay nga simple living lang gyud ang tawo karong panahona aron makatigom bisan diyutay lang para may magamit ug magasto panahon sa emerhensiya ug sa uban pang mga panghitabo nga dili nato matagna.”

Busa kinahanglan nga mopalit ta og usa ka butang kanang gamitonon na lang gyud ug likayan tong mga butang nga dili kaayo kinahanglanon sama ning atong sugilanon. (Katapusan)