Bugti sa pagbudhi

Mihunong ang taksi nga gisakyan nila ni Lita ug Melo atubangan sa Kusina Restaurant sa dalan Ramos. Gusto ni Melo ang maong kan-anan kay kanunay’ng init ang gibaligya nga putsero.

Gani anha mag-standby ang mga taksi driver panahon sa gabii tungod kay dili mahutdan sa pasahero nga mosakay kanila hangtud na sa kaadlawon.

“Tana mosulod na ta aron makahigop ka na og init nga sabaw ug mainitan ang imong tiyan kay nakainom ka ra ba,” ni Melo pa ngadto kang Lita nga klaro kaayo nga nagsumparay ang linaktan tungod sa iyang nainom.

Miorder si Melo og pochero. Gibati ni Lita nga katulgon siya. Taud-taud, miabot ang waiter nga nagdala na sa giorder nila nga pochero. “Sigi na Lit, higop na og init nga sabaw sa pochero para mahuwasan ka sa imong nainom,” giingnan ni Melo si Lita.

“Kahilakon man ko sa imong pagtagad nako Mel uy, labaw pa man ka sa akong uyab nga mibiya nako,” matud ni Lita nga mitutok kang Melo. Mipahiyom si Melo nga nakadungog sa gisulti ni Lita kaniya. “Lahi ko sa ubang lalaki nga kusog mopahimulos sa mga babaye Lit, ilabi na nga natan-aw nako nga buotan ka nga pagka babaye.” Mipadayon sila sa pagkaon. Hinay-hinay nga nahuwasan si Lita gikan sa iyang pagkalipong tungod sa pag-inom og duha ka botelyang beer.

“Salamat kaayo Mel nga gikaila ko ikaw nga mitabang nako. Lain na g’yud kaayo ang akong gibati kaganina,” giingnan ni Lita si Melo samtang gihikap sa dalaga ang bukton sa bag-o niyang higala.

Nagtinutokay silang duha. “Ngano diay’ng nag-inom ka man og makahubog nga ilimnon sulod sa bar?” gipangutana ni Melo si Lita. Miduko si Lita ug wala dayon motubag. Taud-taud mitutok siya kang Melo. “Gusto ko nga magpawala sa kaguol. Di ba giingnan tika nga mas maayo ka pa kay sa akong uyab kaniadto?”

“Mao ba. Sa ato pa gibiyaan ka sa imong boyfriend? Kun mao, susama kita’g kaagi Lit,” giingnan ni Melo si Lita. Milingiw si Melo ug gipunting ang iyang panan-aw didto sa unahan. Taud-taud, nakita ni Lita nga may mga lusok sa luha nga milugmaw sa mga mata sa lalaki.

“Gibiyaan ‘sab ko sa akong girlfriend Lit. College pa mi nga nag-engage apan two months ago nahibaw-an nako nga may lain na siyang boyfriend. Dihang akong gikomprontasi, mihukom siya nga biyaan ko niya,” wala na g’yud kapugngi ni Melo ang paghilak. (Sumpayan)