Veronica ang babaye sa panahon sa gubat

Ako si Veronica, usa ka babayeng sundalo nga nadestino sa 11th Air Defense Artillery Brigade sa Fort Bliss, Texas. Sa panahon sa gubat sa Iraq ug Kuwait niadtong Agosto 2, 2002 sa milabay’ng mga tuig nahibutang kami sa dakong alarma. Nahadlok ako, dili tungod sa gubat, kung dili tungod sa akong pamilya.

Dili nako nga mabuhat nga mobiya kanila apan kinahanglan gayod ang akong serbisyo. Alas dos sa kadlawon, hapit na kami mahiabot sa Iraq, wala ako sa maayong panghuna-huna. Daghang pangutana sa akong kaugalingon, makauli pa ba kaha akong buhi ug makauban ko pa ba kaha ang akong pamilya?

Mao kini ang labing kalisod nga butang nga dapat kong atubangon. Samtang maghigda ako sa akong kama makahinuklog ako sa paghuna-huna mahitungod sa akong anak ug pamilya. Makahilak sa kamatuoran nga dili ko makita ang akong anak nga makamao nang mulakaw ug modagan nga wala man lamang ako sa kiliran niini.

Nagtubo man siya nga wala ako, ang kalipay ania sa akong dughan nga ang seguridad sa akong anak anaa sa mga kamot sa iyang amahan. Miundang pagkasundalo ang akong bana niadtong 1990, lima ka buwan human sa among kasal. Ug karon siya ang miatiman sa among anak apan mabati ko gihapon ang pagka-inahan.

Ang gamay nga butang nga mahimo ko kay ang paghuwat sa hamubong oportunidad nga makaistorya ang akong anak sa telepono ug sa mga sulat nga ginama sa amahan niini. Sa tanan nga inahan nga ania niining gubat, gibati pud ang tumang kasakit karon nga mahilayo sa ilang tibuok pamilya.

Gipatik ko sa akong alimpatakan ang dili paghuna-huna sa akong pamilya. Gipaka-busy ko ang akong kaugalingon sa maong misyon. Dili ko na mabantayan ang mga adlaw. Pag-ampo nalang ang akong gisaligan. Pila nalang kaha ka buwan o tuig ang akong kinabuhi?

Apan nagpabilin akong lig-on nga miatubang sa dakong kagubot ning maong kalibutan. Ania kaming mga sundalo, mapababaye man nanimbasog gayud nga masakmit ang maong kalinaw. Kung mahibalik man ako sa Pilipinas, isaysay ko kining mga panghitabo nga akong nasagubang sa panahon sa gubat ning maong nasud nga akong nahiabtan. (Katapusan)