Maunongon ang gugma

“Kinahanglan gyud nga madakpan pagbalik kadtong tawhana,” nagkanayon si Mr. Ludo Mercado. “Mameligro kita samtang magpabilin pa siyang gawasnon.”

“Ayaw kabalaka, Dad,” ni Brandon pa. “Dili ta magsalig sa mga polis aron madali gayod ang pagkasikop kaniya.”

“Unsay buot mong ipasabot, Hijo?” Sukit sa lagas nga Mercado.

“Motabang ko’g pangita kang Jeffrey, Dad.” “U-unsa? Imo gyung ibutang sa risgo ang imong kaugalingon?”

“Dili ko mag-inusara sa pagpangita kaniya, Dad. Anaa ang akong mga sakop nga motabang kanako. Maglisod si Jeffrey sa pagkuha kanako, Dad, tungod kay nagbinugtong lang siya samtang ako daghan og back-up.”

“Buyno, ikaw ang mag-igo, Hijo. Apan pag-amping baya gyud. Nasayod ka na sa kalibre sa tawo nga inyong pangitaon. Hinumdomi nga usa siya ka kanhi polis.”

“Dili siya magsilbi sa akong grupo, Dad... sa akong mga barkada nga pulos usab kursonadang moihaw og tawo.”

Nianang pagkasunod adlaw mibalik si Jeffrey sa lungsod sa Carcar. Gawas sa pagpamalit og dugang nilang kinahanglanon sa ilang pagtago-tago sa bukid, ang importante niyang tuyo mao ang pagpadala sa mga papeles, journal ug video tape nga nahuptan ni Danica batok sa Bangkulis Gang ngadto ni Col. Vince Noot. -- Sumpayan pa