Mapahimuslanon

Gula 6

Nabatasan na g’yud ni Jeffrey nga kun makakita’g lugar, iya dayong pahimuslan ang higayon. May laing batan-ong b’yuda nga nangaplay og trabaho sa City Hall mao nga iya dayong gikubit.

Gigamit niya ang susama nga taktika nga gigamit niya kang Kim. Wala tuod siya mosipyat kay ang batan-ong byuda daw gihidlaw na usab tingali sa kalipay nga taud-taud na niyang wala matilawi human mamatay ang iyang bana.

Duha na ang gimintin nga babaye ni Jeffrey sa mga kawani sa City Hall. Mora’g nabag-ohan kang Terry, mao kini ang kanunay niyang ikauban ug hinay-hinay na nga naitsa-pwersa si Kim. Usa ka hapon   nga nagpaabot si Jeffrey kang Terry sa parking area, miabot si Kim.

“Naghuwat ka na ba usab sa bag-o mong gikabuangan? Naunsa ka na man tawon uy, wala ka pa ba g’yud makontinto nako?” may pagka singka ang tuno sa sinultihan ni Kim.

Daw nakuratan si Jeffrey mahadlok siya nga magkaabot sila si Kim ug Terry sanglit nakabantay siya nga lain na og tonada ang sinultihan ni Kim. “Mopauli na ko Kim kay may agion pa ko,” matud ni Jeffrey. “Mouban ko!” ni Kim pa nga milingkud dayon sa multicab ni Jeffrey.

Misamot nga nakuyawan si Jeffrey kay sa iyang pagbana-bana hapit na g’yud moabut si Terry. Wala siya masayop kay nagdanga-danga na si Terry sa iyang multicab. “Jeff ganiha ka ra nagpaabot?” pangutana ni Terry nga wala dayon makabantay nga may naglingkod na sa tupad ni Jeffrey.

“Kaganina ra mi nga nagpaabot nimo Day! Maayo kay miabot ka aron ta mahusay!” isog na kaayo ang sinultihan ni Kim. Gibadlong ni Jeffrey si Kim nga magpugong sa iyang gibati, apan gisagpa hinoon siya sa dalaga. Gisanapan na sa kasuko si Kim, gikanaug niya si Terry ug gibugno.

Gipundokan sila sa mga tawo, sagad mga kawani sa City Hall nga bag-o pang nanggawas sa ilang mga opisina. Nahimong tunog kaayo sa City Hall ang maong hitabo nga si Jeffrey giawayan sa duha ka babaye nga iyang gipahimuslan.

Ang maong hitabo wala malilong sa kadagkoan sa City Hall ug hinungdan nga nahimoan og imbestigasyon ang maong isyu. Giangkon sa duha ka babaye nga pulos sila dunay relasyon ni Jeffrey ug gisaysay nila nganong natintal sila sa edaran na nga consultant.

Gikulbaan kaayo si Jeffrey kay ang iyang mga kabuang sa babaye nahibaw-an usab sa iyang asawa. (Sumpayan)