Balik sa gibiyaan nga kalibotan

Gula 13

Sa makausa pa, misal-ot sa salida ang eksena nga limbatianon.

Napakli ang panid sa unang adlaw sa paghibalik ni Gener sa Lumangog. Ang misunod nga buntag maoy panahon sa pagpanimpalad alang kaniya. Gidunganan niya pagbangon ang tuktugaok sa mga manok. Naghinayhinay sa paggawas sa suwambi nga katulganan nilang magtiayon. Nag-amping siya nga dili matugaw ang iyang asawa nga nanaginot pagkatulog bisan hapit na mohingkod ang kabuntagon. Ang bugtong nilang anak nahinanok pa usab.

Gidulong niya ang kusina. Gikuha ang balde nga nabasiyo na sa tubig. Gihapit niya pagkawhat ang sabonera nga gibutang sa may banggera dayon niyang gawas sa balay agi sa pultahan sa kusina. Misugat kaniya ang hikap sa kami’g kaayong huyohoy nga misapigad sa iyang panit.

Apan wala niya baleha ang katigmi sa huyohoy nga gitutho sa nagpanamilit nang kaadlawon. Iyang gitadlas ang dalandalan paingon sa busay. Wala niya tagda ang yamog nga nangumpayot sa mga dahon sa kogon sa daplin sa dalan nga mibasa sa iyang paa dihang natandog sa iyang pag-agi. Dili siya mahadlok nga mabasa kay mao may iyang tuyo ang pagkaligo. Ingon na siya niini sukad pa kaniadto.

Iyang natukmaan ang kamingaw sa busay. Nagsabak og kahilom ang palibot. Gawas sa hinay’ng kanaas sa tubig, wala nay laing kagahob nga iyang nadungog. Wala pay laing nagtikawtikaw sa maong dapit gawas lamang kaniya.

Dihay kahinangop nga miuylap sa iyang kahiladman. Gimingaw siya sa busay. Tipik kini sa iyang kinabuhi -- sa iyang pagkatawo. Mao na kini ang tubig nga gigamit sa mga molupyo sa Lumangog sukad sa iyang pagmatngon og buot. Dugay na siyang wala makaligo sa mabugnaw’ng tubig sa busay. Didto sa kalibotan nga iyang gibiyaan, daginoton ang tubig nga magamit sa katawhan. Lahi dinhi sa matuod niyang kalibotan nga abunda kaayo ang agos sa kinaiyahan. -- Sumpayan pa