Maunongon Ang Gugma

Gula 57

“May hostage-taking nga nahitabo sa checkpoint sa usa ka lungsod sa habagatang Sugbo pipila na ka adlaw ang nakalabay,” pasabot ni Kirat. “Usa ka kanhi polis nga may kasong rape with murder nga mipuga sa bilanggoan ang mi-hostage sa babaye. Sanglit wala may nakaila sa babaye nga gi-hostage sa fugitive, gihimoan na lang siya’g cartographic sketch pamasin nga makatabang kini pagkuha sa identification sa babaye ug sa posibleng pagtultol sa dapit nga gitagoan karon sa fugitive uban sa maong babaye.”

“Nan, unsa may koneksiyon niana sa atong pagpangita kang Danica?”

“Nagtuo ko nga mora’g duna gyu’y dakong koneksiyon, Boss, tungod kay ang cartographic sketch nga gipagawas sa kapolisan uban sa hulagway sa fugitive kaamgid gayod sa panagway ni Danica.”

“U-unsa? Ang buot mong ipasabot nga...”

“Posibleng si Danica ang gidagit sa fugitive, Boss.”

“Imposible.”

“Dili kana imposible, Boss. Kinsay nasayod nga sa paglayas ni Danica, nakasakay siya sa bus nga gisakyan usab sa mipuga nga binilanggo. Ug dihang naapiki ang binilanggo pag-abot sa usa ka checkpoint, siya’y gi-hostage niini.”

Nakahinuktok si Randy sa gibatbat nga mga ideya ni Kirat. -- Sumpayan pa