Kahigayonan sa pagpamintaha

Niping-it ang nawong ni Butch samtang nagkapyot luyo sa Isuzu Elf nga dyip depasaheroan. Konduktor siya ning sakyanana. Nipiyong siya. Nikulima. Daw napuling og abog. Ang iyang walang kamot nagkupot sa gunitanan dapit sa atop sa sakyanan.

Ang iyang tuong kamot may mga pinilo nga papel de banko nga gisup-it taliwala sa mga tudlo sa iyang kinumo.

Gipalutaw niya karong buntaga, alas siyete ang takna, nga iya pang gihunahuna ang tubag sa pangutana sa usa ka pasahero. Puno sa mga pasahero ang dyip sa paglarga gikan sa Tintay jeep terminal sa Talamban. Di man sila molarga kun di mapuno, Dose-dose ang karga sa mga lingkuranan. Dose sa wala. Dose sa tuo. Sa front seat duha. Tintay-Ayala-Colon ilang rota.

Nia pa sila dapit sa skywalk sa Talamban.

“Pilay plete sa Grand Convention, Dong?” matud ganiha sa lalaking hamtong nga naglingkod sa tuong laray sa lingkuranan. Dapit gyud siya’s tumoy. Dikit sa pultahan. Desente og hitsura ang tawo. Singkwentahon na ang pangidaron.

Siya ang kinatiguwangan nga pasahero. Hapit tanang mga pasahero karong Miyerkules sa buntag mga estudyante. Ang pasaherong nangutana mora sab untag estudyante kay naggunit og Reader’s Digest, libro nga may ulohan “Anatomy of Motive” sinulat ni John Douglas ug usa ka long brown envelope.

Gihakgum lang niya ang iyang dala sa walang kamot. Gipatong sa iyang sabakan. Maong iyang karsones. Nagsapatos siya’g itom nga panit. Nag-T-shirt og berde nga haom sa iyang lawas nga mora’g praktisado. Barber iyang buhok nga may pipila ka kabang puti tungod sa uban.

Nagsige nag panawat si Butch sa mga kuwartang gitunol sa mga pasahero. Niabot na sila sa USC Talamban campus. Nilugar ang sakyanan. May mga lima ka estudyanteng nanaug. May upat sang nanakay.

Wa lang gyud una tubaga ni Butch ang pasahero nga motutok niya matag karon ug unya. Gipakunot na sab ni Butch iyang agtang. Niuyog iyang ariyos sa tuong dunggan. Mora siya’g mas tiguwang tan-awon sa iyang edad nga 17. Pag-umangkon siya sa drayber nga si Dante. Di man si Dante mokuha’g konduktor nga dili paryente. Di siya kasalig og laing tawo. Mahadlok og manuik sa koleksiyon.

“Pila bitaw plete, Dong?” nisukot og usab ang pasahero pag-abot nila sa Country Mall. Wa lang gyud una tubaga ni Butch ang tawo. Kay di siya gustong may laing makadungog inig tubag niya.

“Di man gud ko suheto sa pletehan. Kay tagsa ra man ko mosakay og depasaheroan. Duna lay problema akong sakyanan. Ako unang gipatalyer” dugang sa pasahero.

“Maayo bitaw nang di ka suheto. Kay makabungat ko’g mas dako nga pletehan. Way dag-anan ang di suheto kun bungatan og di mao” ni Butch sa iya lang hunahuna. Nipahiyom siya’y pino nga nagpasiklap sa pasahero. Kinse pesos iyang gilaraw nga ibungat. Bisa’g nuybe pesos lang ang tinuod nga plete.

Nakamatikod ang pasahero nga nia na sila sa flyover ibabaw sa San Jose dela Motana/Juan Luna nga karsada. Inig naug dinhi, duol na kaayo sa Grand Convention Center.

“Pila may plete sa Ayala?” sa tawo.

Nakamatikod nga nagdikidiki si Butch sa pagtubag. Apan niining pangutanaha di na gyud siya kalangan og tubag. Kay daghang pasahero ang suheto.

“Diyes” ni Butch. Nikuot ang pasahero sa iyang relos. Nihatag og duha ka coin nga singko pesos ngadtong Butch.

“Duol na man lang sa Ayala ang Grand Convention. Pareho ra na’g plete” sa tawo. Wa suklii ni Butch. Nakaganansiya siya’g peso. Apan pakyas iyang gilaraw nga maka-over price og sayis pesos.

Nalipay na lang sab hinuon siya nga wa nahinayon iyang laraw. Kay sa pagkanaug sa pasahero, gisugat siya’g mga opisyal sa LTO. Dako diay’g ranggo ang tawo sa LTO. Ug duna sila’y seminar sa Grand Convention. Nakapanakla si Butch. Kay unsa kaha’y mahitabo kun nahinayon pa iyang pagpangilad. Unya paurongon una ang dyip, dayon mangutana ang pasahero sa iyang mga higalang taga-LTO. Gingilngigan si Butch nga naghunahuna kun unsa kahay mahitabo niya. (Kataposan)