Maunongon Ang Gugma

Gula 54

“Mao usab kanay akong nasinati. Sulod sa hamubong panahon nga gikauban ko ikaw dinhi sa bukid, ingon sa inanay nga nausab ang tuyok sa akong kalibotan. Mora bag may bahin sa akong pagkatawo nga imong nadiskubre. In one way or another, mora’g gitabangan ko nimo nga makadawat sa kamatuoran nga lisod kaayong dawaton sa akong kabubut-on.”

“Nalipay ko sa akong nabati gikan nimo. Abi ko’g nakadugang lang ko sa kabug-at sa imong suliran.”

“Wala ka makadugang sa akong problema. Nahimo ko hinuon ikaw nga kaunong niining mga higayona. Laay tingali kaayo ang akong kinabuhi dinhi sa bukid kun wala ka pa nga akong ikasulti-sulti.”

Wala na motingog si Danica. Apan nahimuot siya sa hilom sa gisulti ni Jeffrey. At any rate, nasayran niya nga wala diay kini mahasol sa iyang pagpakig-uban niini. Gipakaingon man gud niya nga na-encumbered si Jeffrey sa iyang presensiya.

Namatikdan ni Danica nga sulod sa pipila pa lang ka adlaw nga panag-uban nila ni Jeffrey sa bukid, nag-anam na’g kahugot ang ilang bonding. “Mamalik na ta sa payag,” mitindog si Jeffrey pagkilab sa pipila ka daklit dungan ang pagtapdas sa mga layang dahon sa sagbot nga namilit sa karsones niini. “Init na dinhi.” -- Sumpayan pa